Daśledčyki raku małočnaj załozy vynajšli novy test. Pavodle navukoŭcaŭ z Oksfardskaha univiersiteta rakavyja kletki małočnaj załozy pierapracoŭvajuć izatopy cynku nie tak, jak ich zdarovyja susiedki. Hetaja asablivaść moža być vykarystanaja ŭ jakaści bijamarkiora puchlinnych kletak na rańnich stadyjach.
Daśledavańni pravodzilisia na 10 dobraachvotnicach, ź jakich piać mieli rak małočnaj załozy, a piać — nie. Paraŭnoŭvali kletki puchliny z navakolnymi zdarovymi kletkami i z kletkami zdarovych žančyn. Siońniašnija technałohii dazvalajuć praanalizavać najaŭnaść mietałaŭ u kletkach navat u drobnych kancentracyjach, što i dapamahło adsačyć los izatopaŭ cynku ŭ załozie. Daśledavańni vyjavili rozny izatopny skład cynku ŭ kryvi, u zdarovych tkankach i ŭ kletkach puchliny. Vierahodna, inšyja mietały mohuć raźmiarkoŭvacca ŭ kletkach padobnym čynam, što daje spadziavacca na źjaŭleńnie i inšych bijamarkioraŭ.
Paśpiachovaść lačeńnia raku (u tym liku i raku małočnych załoz) naŭprost zaležyć ad pamieru i raspaŭsiudu puchliny. Kali vy vokam bačycie puchlinu na załozie, namacvajecie jaje navat praz vopratku, kali smočka vidavočna ŭciahnutaja, ź jaje točycca niemaviedama što, dyj źjavilisia boli — heta śviedčyć pra poźnija stadyi raku, kali šancy vylekavacca pryvidnyja.
Voś čamu pravodziacca skryninhavyja prahramy mamahrafii. Ale i heta nie vyjaŭlaje samych rańnich stadyj raku. Bijamarkiory mohuć dapamahčy tam, dzie ruki chirurha i vočy renthienołaha jašče nie ŭ stanie adšukać voraha.
Ci ŭratuje heta abiacanyja tysiačy žyćciaŭ — pytańnie. Tyja ž sproby masava pravodzić mamahrafiju na siońnia siabie nie apraŭdali. A voś dzie dakładna dapamoža, dyk heta tam, dzie inšyja łabaratornyja mietady nie dajuć kančatkovaha adkazu: rak albo nie?
Kamientary