U subotu dniom 28-hadovy afraamierykaniec Ismaił Brynśli zastreliŭ ŭ ńju-jorkskim rajonie Bruklin dvuch palicejskich, paśla čaho pakončyŭ z saboj.
Kalehi zahinułych u Ńju-Jorku addajuć apošniuju pašanu.
Prezident ZŠA Barak Abama asudziŭ zabojstva dvuch palicejskich, zastrelenych padčas patrulavańnia i vykazaŭ spačuvańnie ich siemjam.
Achviarami zabojstva stali 32-hadovy vychadziec Paŭdniova-ŭschodniaj Azii Veńcziań Lu i 40-hadovy łacinaamierykaniec Rafael Ramas.
Złačyniec, uzbrojeny pistaletam, padyšoŭ da palicejskaj mašyny i, nie skazaŭšy ni słova, adkryŭ stralbu. Zaŭvažyŭšy nabližeńnie druhoj palicejskaj mašyny, Brynśli zabieh u mietro i zastreliŭsia. Paranienyja palicejskija byli dastaŭlenyja ŭ balnicu, adnak vyratavać ich nie zdoleli.
Prykładna za try hadziny da napadu na patrulnych Brynśli pakinuŭ na svajoj staroncy ŭ sacyjalnaj sietcy Instagram niekalki pahroz u adras palicyi. Adno z paviedamleńniaŭ było: «Jany zabili adnaho z našych, davajcie zabjem dvaich ź ich». Pad hetym nadpisam mužčyna raźmiaściŭ fatahrafiju pistaleta. Pad apošnim paviedamleńniem Brynśli pastavili «łajki» kala 200 karystalnikaŭ.
Incydent adbyŭsia na fonie masavych akcyj pratestu, źviazanych z apraŭdańniem biełych palicejskich, jakich abvinavačvali ŭ pryčynieńni śmierci ciemnaskurym.
Kamientary