Pieršaja žančyna – vice-premjerka. Piać faktaŭ pra Natallu Kačanavu
Namieśnicaj premjer-ministra pa sacyjalnych pytańniach stała staršyńka Navapołackaha harvykankama Natalla Kačanava. Jana zamianiła na hetaj pasadzie Anatola Tozika, viadomaha svaimi nieardynarnymi prapanovami i novaŭviadzieńniami.
Chto ž takaja spadarynia Kačanava?
Pieršaja vice-premjerka – žančyna
U niezaležnaj Biełarusi jašče nie było nivodnaj žančyny, jakaja b zajmała takuju vysokuju pasadu. Jak nie było žančyn i siarod premjer-ministraŭ. Jašče za časami BSSR pasadu namieśnicy staršyni Savieta ministraŭ zajmała Nina Mazaj (1985—1991), a voś Łukašenka žančynam hetaj vysokaj pasady nie daviaraŭ.
Varta zaŭvažyć, što na siońniašni momant siarod usich raj- i harvykankamaŭ krainy tolki ŭ dvuch kiravali žančyny. Heta Navapołack, dzie staršyniavała Natalla Kačanava (ad listapada 2007). A taksama hłuchi Dobrušski rajon, dzie apošnija dzieviać hadoŭ staršyniuje Volha Mocharava. Mała ŭ nas vychodzić «krepkich chaziajśćvieńnic».
«Dziełavaja žančyna ŭ maim razumieńni — heta dakładna nie žančyna-vamp i nie ścierva, jak zvyčajna pakazvajuć modnyja hlancavyja časopisy», — kaža Natalla Kačanava.
Ruskaja pa nacyjanalnaści
Natalla Kačanava naradziłasia ŭ 1960 hodzie ŭ Połacku. U aficyjnaj daviedcy na sajcie Navapołackaha harvykankama napisana: «Pa nacyjanalnaści — ruskaja». Skončyła Navapołacki politechničny instytut (1981) pa śpiecyjalnaści «Vodazabieśpiačeńnie i kanalizacyja», a taksama Akademiju kiravańnia pry prezidencie Biełarusi (2006) pa śpiecyjalnaści «Dziaržaŭnaje kiravańnie nacyjanalnaj ekanomiki». Z toj samaj ankiety vynikaje, što Natalla Kačanava vałodaje anhlijskaj movaj, a taksama maje orden Śviatoj Jeŭfrasińni Połackaj.
U Natalli Kačanavaj jość dvoje bratoŭ. «My — družnaja, rabočaja siamja, baćki — ludzi vielmi prostyja: tata pracavaŭ u liciejna-miechaničnym cechu kavalom, bryhadziram; mama ŭsio žyćcio adpracavała na šviejnaj fabrycy. Doma zaŭsiody, kolki jaje pamiataju, šyła i viazała — čaho ja, naprykład, nie ŭmieju i, ščyra pryznacca, prosta nie lublu!» — kazała Kačanava ŭ intervju.
Maje dźviuch dačok
Novy vice-premjer zamužam, maje dźviuch dačok. «Chaču skazać, što ŭ nas z mužam vydatnyja dzieci, ja ich vielmi lublu, i ŭ mianie nikoli, paŭtarusia, nikoli nie ŭźnikała ź imi prablem», — kazała Natalla Kačanava.
Starejšaja dačka Volha vučyłasia na biudžecie ŭ Minskim miedycynskim univiersitecie, z mužam paznajomiłasia padčas vučoby na piedyjatryčnym fakultecie. U pary jość syn. Žyvuć u Minsku.
Alena — druhaja dačka. Jana skončyła Połackuju himnaziju, a ciapier vučycca na histaryka-fiłałahičnym fakultecie PDU. Sama spadarynia Natalla kaža, što dačka nie nadta lubić afišavać, kim pracuje jaje mama.
«Ja baču, ź jakim honaram havoryć pra Biełaruś maja małodšaja dačka», — kazała staršynia harvykankama.
Biełaruskaj movy pamienieła
Tym nie mienš, žychar Navapołacka, litaratar Vinceś Mudroŭ kaža, što za čas pracy Kačanavaj u horadzie źnikli amal usie šyldy na biełaruskaj movie.
«Niadaŭna ŭ nas u horadzie byŭ zbudavany vializny novy mikrarajon, 8-y. I tam niama ani dziciačaha sadka, ani škoły. Takija voś vyniki žyćciadziejnaści Natalli Ivanaŭny», — paciskaje plačyma sp.Vinceś.
Maryła być vychavacielkaj u dziciačym sadku
Usio dziacinstva Natalla Kačanova ŭsurjoz zajmałasia sportam. Spačatku — lohkaj atletykaj, a paśla — valejbołam. Chacia pra spartovuju karjeru, kaža, nie maryła. A voś vielmi chacieła być vychavacielkaj u dziciačym sadku, a ŭ NPI pastupiła vypadkova, dziakujučy sportu. Da ich na valejbolnuju placoŭku prychodziła vykładčyca instytuta, jakaja i skazała: «A pastupajcie da nas, budziecie vučycca i zajmacca valejbołam».
«Ja, naprykład, ź siamjoj da 30 hadoŭ pražyła na supolnaj kuchni. U nas nie było vanny, haračaj vady — heta toj dom, u jakim my žyviem da hetaha času. Tam siońnia taksama jość supolnyja kuchni. A tady i my žyli z susiedziami i nie ličyli, što ŭ nas štości drenna», — kazała jana ŭ 2011 hodzie.
Kaža, što adzieńnie nabyvaje ŭ navapołackim «Domie handlu» ci ŭ adnym z raletaŭ Połacka. Cyrulniaj karystajecca ŭ połackim «Domie bytu». A voś hatuje vielmi-vielmi mała.
Kamientary