Minekanomiki i Minhandlu patłumačyli novyja pryncypy farmiravańnia cen

Ministerstvy handlu i ekanomiki rekamiendavali novyja praviły farmiravańnia cen, paviedamiła pres-słužba Minhandlu.

Pry farmiravańni adpusknych cen:

— adpusknaja cana moža być pavialičanaja vytvorcam na vieličyniu źmianieńnia koštu impartnych syraviny i materyjałaŭ, jakija pachodziać z trecich krain, što nie ŭvachodziać u JEAES, i pastupili paśla 18 śniežnia 2014 hoda, z ulikam jaje doli ŭ adpusknoj canie. Pry hetym pavieličeńnie cen na syravinu i materyjały ajčynnaha pachodžańnia, a taksama z krain Jeŭrazijskaha ekanamičnaha sajuza nie dapuskajecca; 

— košt impartnych syraviny i materyjałaŭ, jakija pachodziać z trecich krain, nie moža być pavialičany bolš čym na pracent źmianieńnia kursu biełaruskaha rubla da kursu valuty dahavora na datu pastanoŭki na ŭlik, pamienšanaha na 5%. Pry hetym płanavy ŭzrovień rentabielnaści nie moža pieravyšać faktyčny ŭzrovień rentabielnaści pa arhanizacyi za studzień—vierasień 2014 hoda pa hetym vidzie dziejnaści; 

- na impartavanyja tavary, nabytyja paśla 18 śniežnia 2014 hoda, dapuskajecca pavieličeńnie adpusknoj cany nie bolš čym na pracent źmianieńnia kursu biełaruskaha rubla da kursu valuty dahavora na datu pastanoŭki na ŭlik, pamienšanaha na 5%, pry ŭžyvańni rentabielnaści prodažu nie bolš čym na 3%. 

Pry raźliku cen realizacyi subjektami haspadarańnia, jakija ažyćciaŭlajuć aptovy handal tavarami, nabytymi na terytoryi respubliki, i raźliku roźničnych cen subjektami haspadarańnia, što ažyćciaŭlajuć roźničny handal: 

- užyvańnie handlovych (aptovych) nadbavak pa peŭnych vidach tavaraŭ dapuskajecca ŭ pamierach, jakija nie pieravyšajuć užytyja pa stanie na (da) 18 śniežnia 2014 hoda (biez uliku praviedzienych u śniežni 2014 hoda akcyjnych mierapryjemstvaŭ), pry ŭžyvańni rentabielnaści prodažu nie bolš čym na 3%; 

- realizacyja płodaaharodninnaj pradukcyi sa stabilizacyjnych fondaŭ dapuskajecca pa roźničnych cenach (adpusknych cenach z ulikam handlovaj nadbaŭki), ustanoŭlenych rašeńniami abłvykankamaŭ i Minskaha harvykankama na śniežań 2014 hoda. 

Jak prakamientavali ŭ Minhandlu, hetyja rekamiendacyi vypracavanyja «ŭ miežach vykanańnia daručeńniaŭ kiraŭnika dziaržavy i ŭrada Biełarusi pa niedapuščeńni nieabhruntavanaha rostu cen i zabieśpiačeńni spažyvieckaha rynku nieabchodnym asartymientam tavaraŭ, a taksama z ulikam daručeńnia premjer-ministra ŭ miežach dadzienych paŭnamoctvaŭ Ministerstvu handlu i Ministerstvu ekanomiki».

«Pry vykanańni subjektami haspadarańnia rekamiendavanych pravił farmiravańnia (vyznačeńnia) cen da hetych subjektaŭ nie buduć užyvacca miery adkaznaści, praduhledžanyja pastanovaj Savieta ministraŭ № 1207 ad 19 śniežnia 2014 hoda», — zaznačyli ŭ viedamstvach. 

«Kali my dzieści ŭručnuju pačali štości rehulavać, dyk znajdzicie čas pahavaryć ź biźniesmienami, asabliva heta datyčycca handlu, kab jany vam raskazali, dzie jakija prablemy, i ŭ vas jość usie paŭnamoctvy dla taho, kab tam pasunucca», — zajaviŭ 15 studzienia Alaksandr Łukašenka, vystupajučy ŭ parłamiencie. «Choć ja tut nie baču taksama nijakich prablem, — skazaŭ jon. — Prymajučy hetaje rašeńnie, ja pieršym čynam mieŭ na ŭvazie toje, što ŭ nas niesuvymierna ź minułymi kryzisami tańniejšyja resursy. Tamu ničoha strašnaha niama, kali my pratrymajemsia na hetym uzroŭni cen. My ich nie panižajem, ale, moža, dzieści i ŭručnuju pryjdziecca ich adrehulavać na asobnyja hrupy tavaraŭ. U hetym niama nijakaha strachu». 

• 0
• 0
• 0
• 0
• 0
• 0
• 0
• 0