Sud nad «biełaruskim špijonam» u Litvie budzie adkrytym

Abvinavačany ŭ špijanažy na karyść Biełarusi Ramuald Lipski, jaki da aryštu pracavaŭ elektrykam na pradpryjemstvie Oro navigacija, admaŭlaje, što zdradziŭ Litvie.

«Viadoma, ja nie pryznajusia, heta pravakacyja», — skazaŭ žurnalistam 57-hadovy Lipski. Na pytańnie, chto, na jaho dumku, arhanizavaŭ pravakacyju, jon adkazaŭ: «Ułada, orhany biaśpieki».

Kalehija troch sudździaŭ Vilenskaha akruhovaha suda ŭ piatnicu pačała razhladać kryminalnuju spravu, pavodle jakoj Lipski abvinavačvajecca ŭ špijanažy.

Prakuror Hienieralnaj prakuratury Redas Savickis paprasiŭ sudździaŭ vieści zakrytyja pasiadžeńni, a advakat abvinavačanaha Śniehuole Mažejkienie — adkrytyja.

Tłumačačy, čamu nieabchodnyja zakrytyja pasiadžeńni, prakuror adznačyŭ, što ŭ spravie šmat kopij dakumientaŭ, aŭdyjozapisaŭ, u pieradačy jakich słužbovaj asobie biełaruskaj raźviedki abvinavačvajecca Lipski.

«Na adkrytych pasiadžeńniach hetaja infarmacyja stała b publičnaj, ź joj mahli b aznajomicca nie tolki ŭdzielniki pracesu, akramia hetaha, byli b apublikavanyja sposaby i mietady raźviedki, taktyčnyja dziejańni», — skazaŭ Savickas.

Advakat Lipskaha adznačyła, što ŭsie schiemy, u pieradačy jakich abvinavačvajecca rabotnik Oro navigacijos, źjaŭlajucca publičnaj infarmacyjaj, jaje lohka možna znajści ŭ internecie.

Na adkrytym pasiadžeńni nastojvaŭ i Lipski. «Ja vielmi chaču, kab pasiadžeńnie było adkrytym, bo svaju vinu nie pryznaju — ja razmaŭlaŭ ź biełarusam, ale hetaja infarmacyja nie sakretnaja,

— Nichto mianie nie zavierbavaŭ, nie razumieju, kali Departamient dziaržbiaśpieki naziraŭ za mnoj stolki času, čamu nie zafiksavana, što mnie i majoj siamji pahražali. Ja chaču, kab Litva ŭbačyła, jak da nas pryjazdžajuć biełarusy. DDB sačyŭ za hetym čałaviekam, viedaŭ, što jon prystaŭ da mianie, ale ničoha nie rabiŭ. U mianie jość što raskazać».

Sudździa Jurhita Mačonitie paviedamiła, što pasiadžeńni buduć adkrytymi, za vyklučeńniem tych, na jakich buduć dapytvać troch śviedkaŭ.

Prakuror Savickas na sudzie skazaŭ, što Lipski pieradavaŭ infarmacyju rabotniku biełaruskaj raźviedki Siarhieju K. Pa słovach Savickasa, u Lipskaha šmat kantaktaŭ u Biełarusi i Rasii, jon časta jeździŭ u hetyja krainy.

Paviedamlajecca, što supracoŭnik kampanii Oro navigacijos tajemna fatahrafavaŭ dakumienty i inšyja abjekty i pieradavaŭ biełaruskaj raźviedcy.

Dla Biełarusi źbirałasia i była pieradadziena infarmacyja ab litoŭskim vojsku, jaho čaściach, dziaržaŭnych pradpryjemstvach, jakija majuć stratehičnaje značeńnie dla nacyjanalnaj biaśpieki Litvy, ich dziejnaści, abjektach i abstalavańni na ich.

Lipski zatrymany prykładna hod tamu, jamu pahražaje pazbaŭleńnie voli da 15 hadoŭ.

Dyrektar Departamienta dziaržbiaśpieki Hiedymin Hryna śćviardžaŭ, što ŭsia apieracyja doŭžyłasia bolš za try hady. Jon nie kamientavaŭ, kolki dadzienych padazravany paśpieŭ pieradać Biełarusi. Vierahodna, što atrymanaj infarmacyjaj Biełaruś dzialiłasia i z Rasijaj.

• 0
• 0
• 0
• 0
• 0
• 0
• 0
• 0