Dyk kaho ž departavali ź Biełarusi? Sałafitaŭ ci «Chizb ut-Tachryr»?

Dziaržaŭny kanał Biełaruś-1 niadaŭna paviedamiŭ ab zatrymańni dvaccaci «musulmanaŭ-sałafitaŭ». Pavodle žurnalistaŭ, vypadak adbyŭsia jašče pry kancy minułaha hodu, adnak čamuści hramadskaści ab im paviedamili tolki paśla taho, jak adhrymieli streły ŭ redakcyi «Šarli Ebdo». Zhodna z kanałam, u liku zatrymanych było 8 zamiežnych hramadzian i 12 hramadzian Biełarusi.

Z nastupnych tłumačeńniaŭ KDB stała viadoma, što hetyja ludzi ŭvachodzili ŭ hrupu, sfarmavanuju pad upłyvam isłamskaj palityčnaj arhanizacyi «Chizb ut-Tachryr», tamu zamiežnikaŭ ź liku zatrymanych departavali. Havorka išła ŭžo pra 5 zatrymanych zamiežnikaŭ.

Adnak ci sapraŭdy departavanyja byli prychilnikami «Chizb ut-Tachryr»? Va ŭkrainskim adździaleńni hetaha ruchu ŭ hetym sumniajucca.

«Jakich-niebudź kankretnych faktaŭ taho, što zatrymanyja — mienavita siabry «Chizb ut-Tachryr», pres-sakratar KDB Artur Strech nie ahučyŭ. Bolš za toje, jaho paviedamleńnie dosyć supiarečlivaje: z adnaho boku śćviardžajecca, što «byli zatrymany 20 musulman-sałafitaŭ», a ź inšaha — havorycca ab tym, što hrupa sfarmiravałasia pad upłyvam «Chizb ut-Tachryr». Śpiecyjalistam u hetaj halinie dakładna viadoma, što sałafity i «Chizb ut-Tachryr» — heta roznyja isłamskija arhanizacyi, jakija majuć adroznyja pohlady ŭ šerahu isłamskich pravavych pytańniaŭ i šlachoŭ raspaŭsiudu isłama», — skazaŭ «Našaj Nivie» kiraŭnik infarmacyjnaha ofisu ruchu «Chizb ut-Tachryr» va Ukrainie Fazył Amzajeŭ.

Fazył Amzajeŭ adznačyŭ, što «nivodnaha znajomaha aktyvista «Chizb ut-Tachryr» u Biełarusi nie maje».

Nam pakul nie ŭdałosia i vyśvietlić nacyjanalnaść usich departavanych. Kamientujučy zdareńnie dla «Jeŭraradyjo», imam Chatyb Biekir Murzič skazaŭ žurnalistam, što, pavodle jahonaj infarmacyi, adzin z departavanych — hramadzianin Azierbajdžana.

Adnak u konsulstvie Azierbajdžana ŭ Biełarusi hetuju infarmacyju nie paćvierdzili: maŭlaŭ, pavodle ich infarmacyi, za apošni čas praź niezakonnuju relihijnuju albo ekstrymisckuju dziejnaść nikoha nie vysyłali.

Sałafizm — płyń u isłamie, prychilniki jakoj razumiejuć relihiju ŭ tym vyhladzie, «u jakim jaje razumieŭ prarok». Sałafity, naprykład, ličać pahanstvam pakłanieńnie mahiłam śviatych i asudžajuć śviatkavańnie Dnia narodzinaŭ praroka Muchamieda. Heta taki radykalny, fanatyčny ruch u isłamie. Sałafisty majuć svaje palityčnyja ruchi, upłyvovyja ŭ niekatorych isłamskich krainach. Nie ŭsie sałafisty — prychilniki «džychadu», ale dola radykałaŭ u hetym ruchu vysokaja. 

U svaju čarhu, «Chizb ut-Tachryr» — heta mižnarodny isłamski palityčny ruch, jakaja stavić svajoj metaj adradžeńnie Chalifata z šaryjackimi zakonami ŭ tradycyjna musulmanskich rehijonach. Mienavita tamu jon usprymajecca jak pahroza ŭ Rasii ź jaje Tatarstanam, Baškartastanam i Kaŭkazam. 

«Chizb ut-Tachryr» pryznanaja terarystyčnaj arhanizacyjaj tolki ŭ adnoj krainie śvietu — u Rasii. U toj ža čas u susiedniaj Ukrainie, jak i ŭ krainach Jeŭrasajuza partyja dziejničaje lehalna, bo nie vykarystoŭvaje hvałtoŭnych mietadaŭ baraćby za dasiahnieńnie svaich metaŭ. Tym nie mienš, i hety ruch apošnim časam radykalizavaŭsia i pieratvaryŭsia ŭ bazu dla ekstremisckich isłamisckich hrupovak u mnohich krainach. I blizkija da «Chizb ut-Tachryr» imamy viaduć aktyŭnuju ahitacyju suprać zachodniaj cyvilizacyi.

U dyktatarskich krainach Centralnaj Azii (Uźbiekistanie, Kazachstanie) ułady aryštoŭvajuć i źniavolvajuć aktyvistaŭ «Chizb ut-Tachryr».

U pres-słužbie Kamiteta dziaržaŭnaj biaśpieki bolš infarmacyi pa spravie paviedamić admovilisia. U sakaviku KDB maje apublikavać śpis arhanizacyj, pryznanych terarystyčnymi i ekstremisckimi ŭ našaj krainie, paviedamili «Našaj Nivie» ŭ pres-słužbie. Tady stanie zrazumieła, jakija ź isłamskich arhanizacyj pryznanyja ekstremisckimi ŭ našaj krainie. 

• 0
• 0
• 0
• 0
• 0
• 0
• 0
• 0