16 studzienia ŭ sudzie Centralnaha rajona Minska abvieščany prysud pa spravie ab śmiarotnym najeździe na 10-hadovaha školnika na bulvary Šaŭčenki ŭ stalicy viasnoj minułaha hoda.
43-hadovy kiroŭca pryhavorany da troch hadoŭ pazbaŭleńnia voli ŭ papraŭčaj kałonii va ŭmovach pasialeńnia. Kiravać transpartnymi srodkami jamu zabaroniena na piać hadoŭ.
Sud abaviazaŭ abvinavačvanaha vypłacić kampiensacyju maralnaha ŭronu paciarpiełym: baćku dziciaci — 100 młn. rubloŭ, maci — 200 młn. rubloŭ, dziaduli — 50 młn. rubloŭ.
Nahadajem, 26 sakavika 2014 hoda kala 14.00 na piešachodnym pierachodzie aŭtamašynaj «Volva-XC90» byŭ śmiarotna traŭmavany chłopčyk. U dačynieńni da vadziciela raspačali kryminalnuju spravu.
Śledstva źviartała ŭvahu na toje, što hety nierehulavany piešachodny pierachod paznačany haryzantalnaj darožnaj raźmietkaj ziebra i darožnymi znakami «Piešachodny pierachod», što ŭ adpaviednaści z PDR patrabuje ad vadziciela pavyšanaj uvahi i pryniaćcia mier da źnižeńnia chutkaści, až da spynieńnia transpartnaha srodku, dla zabieśpiačeńnia biaśpiečnych umoŭ ruchu piešachodaŭ.
Padčas rasśledavańnia byli praviedzienyja try śledčyja ekśpierymienty i šerah sudovych ekśpiertyz, apytanyja vidavočcy. Ustanoŭlena, što pazadarožnik ruchaŭsia z chutkaściu nie mienš jak 55 km/hadz pry dazvolenaj na hetym učastku darohi chutkaści nie bolš za 40 km/hadz. Atrymanyja źviestki, jakija paćviardžajuć, što vadziciel vyjaviŭ złačynnuju niadbajnaść, nieabačlivaść i niaŭvažlivaść da darožnaha stanovišča i jaho źmianieńniaŭ, vybraŭ chutkaść, jakaja nie zabiaśpiečvała jamu kantrol za biaśpiečnym rucham ułasnaha transpartnaha srodku. Jon taksama nie ŭličyŭ najaŭnaść pierad piešachodnym pierachodam dvuch aŭtamabilaŭ, jakija abmiažoŭvali ahlad darohi sprava, uklučajučy ŭčastak piešachodnaha pierachodu, i nie pierakanaŭsia ŭ adsutnaści pierad imi piešachodaŭ, što ŭstupali ci ŭstupili na ziebru.
Śledstva ŭkazvała, što parušeńnie kiroŭcam šerahu punktaŭ PDR maje pramuju pryčynna-vynikovuju suviaź z padziejaj darožna-transpartnaha zdareńnia i nastupstvami — śmierciu dziciaci.
Dziejańni, učynienyja abvinavačvanym, śledčymi byli kvalifikavanyja jak złačynstva, praduhledžanaje č. 2 art. 317 KK.
Padčas rasśledavańnia abvinavačvany svaju vinu nie pryznaŭ. Pry hetym śledstva źviarnuła ŭvahu na toje, što za apošnija niekalki hadoŭ jon bolš za 25 razoŭ pryciahvaŭsia da administracyjnaj adkaznaści za parušeńnie PDR, ź ich bolš za 10 razoŭ — za nievykanańnie chutkasnaha režymu. Za paŭhadziny da najezdu aŭtamatyčnaj kamieraj videanazirańnia na praśpiekcie Puškina było zafiksavana čarhovaje pieravyšeńnie im chutkasnaha režymu na 21 km/hadz.
Svaju vinu abvinavačvany nie pryznaŭ i ŭ sudzie. Jon śćviardžaŭ, što nie pieravyšaŭ chutkaść, jechaŭ 40 km/hadz, a na piešachodnym pierachodzie i pablizu jaho nikoha nie było.
Padčas sprečak 13 studzienia dziaržabvinavaŭca paprasiŭ pryhavaryć padsudnaha da piaci hadoŭ pazbaŭleńnia voli z adbyvańniem pakarańnia ŭ kałonii-pasialeńni. Abarona akcentavała ŭvahu suda na tym, što dzicia pierabiahała prajeznuju častku pa-za piešachodnym pierachodam. Ab tym, što chłopčyk byŭ źbity za pierachodam, u sudzie havaryli i ekśpierty. U apošnim słovie abvinavačvany ŭ čarhovy raz paprasiŭ prabačeńnia ŭ baćkoŭ zahinułaha.
Baćki chłopčyka zajaŭlali ŭ sudzie iski ab materyjalnaj kampiensacyi maralnaha ŭronu. Na karyść baćki — 300 młn. rubloŭ (100 młn. užo byli pieradadzienyja abvinavačvanym), maci — 300 młn., dziaduli — 100 młn. rubloŭ.
