U kancy 2014 hoda Apple pradavała pa 34 tysiačy iPhone na hadzinu
Vypusk pavialičanych iPhone prynies kupiercincam pryjemnyja rekordy ŭ prodažach i prybytku.
Kvartalnaja spravazdača Apple utrymlivaje nadzvyčaj vialikija ličby. Ź vieraśnia pa śniežań kampanija pradała 74,5 młn smartfonaŭ iPhone, što amal na pałovu bolš za anałahičny pakaźnik u minułym hodzie. Na dolu smartfonaŭ pryjšłosia 69% vyručki.
Kožnuju hadzinu Apple pradavała 34 tysiačy «ajfonaŭ». Šery iPhone 6 Plus staŭ miljardnaj pryładaj na apieracyjnaj sistemie iOS.
Siaredniaja cana iPhone vyrasła na 50 dalaraŭ u paraŭnańni ź minułym hodam i skłała 687 dalaraŭ. Jak ni dziva, rost cen adbyŭsia pa voli spažyŭca: karystalniki sami addali pieravahu bolš darahim madelam.
Niahledziačy na niaspynnaje padzieńnie rynku piersanalnych kampjutaraŭ, Apple pradała 5,5 młn svaich kampjutaraŭ Mac, što na 0,7 młn bolš za apošni kvartał minułaha hoda. Vyrasła i vyručka ad AppStore, iTunes i inšych ličbavych servisaŭ, jana skłała 4,8 młrd dalaraŭ albo 6,5% ad usioj vyručki. Ale płanšety iPad pradajucca horš i horš čatyry kvartały zapar, za apošni realizavana 21,4 młn płanšetaŭ, što na 4,6 młn mieniej za apošni kvartał 2013 hoda.
Ahułam vyručka kampanii skłała za nazvany pieryjad 74,6 młrd dalaraŭ (amal na tracinu bolš za apošni kvartał 2013 hoda), a prybytak — 18 młrd dalaraŭ. Abodva pakaźniki — absalutny rekord Apple.
Asnoŭnaja pryčyna pośpiechaŭ Apple — pradstaŭlenyja ŭ vieraśni 2014 hoda iPhone 6 i iPhone 6 Plus. Ale z toj prezientacyi jašče nie ŭsie pradukty trapili na rynak. Jak paviedamiŭ hiendyrektar kampanii Cim Kuk, pradstaŭleny tady ž razumny hadzińnik Apple Watch źjavicca ŭ prodažy ŭ krasaviku 2015 hoda pa canie ad 349 dalaraŭ za samuju prostuju madel.
Čytajcie taksama: Piać pryncypaŭ Styva Džobsa, jakim zdradziła Apple
KDB aktyŭna viarbuje palitviaźniaŭ, vyzvalenych pa pamiłavańni — pravaabaroncy5
Kamientary