Eks-sienatar, vinavaty ŭ hučnaj avaryi, adramantavaŭ «Łend Kruzer» za košt pradpryjemstva na sumu 300 młn rubloŭ

U 2012 hodzie na trasie Minsk — Hrodna adbyłasia hučnaja avaryja. Były člen savieta respubliki, kiraŭnik sielhaspradpryjemstva «Mažejkava» Kazimir Rachatka na słužbovym džypie «Tajota Łend Kruzer» prataraniŭ nievialički «Opiel Astru».

Pryčym situacyja była takaja: na pustoj darozie «Tajota» vyjechała na sustrečnuju pałasu. U «Astry» jechali šeść čałaviek.

Kiroŭca, jaho žonka i 8-hadovaja dačka, ciešča i cieść, žončyna siastra — usie trapili ŭ balnicu. 53-hadovy cieść u reanimacyi pamior. Astatnija atrymali pierałomy ruk i noh, u žonki kiroŭcy prablemy z chrybtom. Rachatka taksama papaŭ u balnicu. Praŭda, ź mienšymi traŭmami.

Adrazu zahavaryli pra toje, što za kraty Rachatka nie adpravicca. Maŭlaŭ, taki čałaviek… Tak i vyjšła.

Na byłoha sienatara zaviali kryminalnuju spravu za parušeńnie Pravił darožnaha ruchu, što paciahnuła pa nieaściarožnaści śmierć čałavieka. Ale ŭ vyniku ŭ kancy hoda rasśledavańnie cicha spynili. Tady hety fakt nie afišavaŭsia.

Jak paviedamiła nam pradstaŭnica Śledčaha kamiteta Julija Hančarova, vina abvinavačanaha była dakazana. Jon jaje pryznaŭ. I było pryniataje rašeńnie spynić spravu «ŭ suviazi z aktam amnistyi».

Padstavami stali pavažny ŭzrost Rachatki i toje, što złačynstva ździejśniena nie naŭmysna.

Ale z časam uźnikła novaja kalizija. Kazimir Rachatka ramont słužbovaha džypa pravioŭ za hrošy svajho pradpryjemstva.

Rajonny prakuror paličyŭ heta niezakonnym. I padaŭ u sud — na kampiensacyju škody Lidskamu rajonnamu sielskahaspadarčamu ŭnitarnamu pradpryjemstvu «Mažejkava», jakoje šmat hadoŭ Rachatka i ŭznačalvaŭ.

Akazałasia, što za ramont «Tajoty» «Mažejkava» vypłaciła 342 773 100 (!) rubloŭ.

Heta šalonyja hrošy, tym bolš dla vioski. Na kaniec 2012 hoda heta składa- ła amal $40 tysiač — cana novaj mašyny.

Lidski rajonny sud 29 kastryčnika 2014 hetuju sumu źmienšyŭ udvaja: Rachatku abaviazali vypłacić 170 miljonaŭ.

Ale eks-sienatar paličyŭ i hetuju sumu nadta vysokaj — vyrašyŭ abskardžvać.

«Ja prasiŭ by źmienšyć kampiensacyju škody ŭ suviazi z tym, što 30 hadoŭ adpracavaŭ na pradpryjemstvie… Chutkaści ja nie pieravysiŭ, prosta vyjšaŭ na levy bok ruchu i niešta zdaryłasia pa stanie zdaroŭja», — prasiŭ Rachatka na pasiadžeńni abłasnoha suda 26 studzienia.

I źviartaŭ uvahu, što ŭsia suma — heta ramont aŭto z ulikam ahulnaj amartyzacyi, a nie tolki nastupstvaŭ avaryi. «Hetamu džypu ŭžo 12 hadoŭ».

Viadoma, što padčas ramontu sałon džypa abciahnuli skuraj.

«Bo siaduški ŭžo byli padranyja», — narakaŭ Rachatka.

Praŭda, ciapier sudu, kab vyznačyć, jakaja suma pajšła na ramont mienavita paškodžańniaŭ ad avaryi, treba źviartacca da ekśpiertaŭ.

«Chto budzie płacić za ekśpiertyzu? — pytaŭsia sudździa. — Ekśpiert palec na palec nie pakładzie biez apłaty. Budziecie płacić?»

«Nie, nie budu», — adniekvaŭsia Rachatka. «Mažejkava» taksama admoviłasia.

U vyniku kalehija sudździaŭ pryniała rašeńnie prypynić spravu i pryznačyć ekśpiertyzu. A vydatki pa jaje praviadzieńni pakul uskłaści na pradpryjemstva.

Kazimir Rachatka admoviŭsia adkazać na pytańni žurnalista «Našaj Nivy». Skazaŭ tolki, što pakinuŭ dyrektarstva ŭ «Mažejkavie» hod nazad.

Nie pa svaim žadańni.

* * *

Kazimir Rachatka naradziŭsia ŭ vieraśni 1952 hoda.

Pa adukacyi jon inžynier-miechanik, ekanamist-mieniedžar. Uznačalvaŭ ŁRSUP «Mažejkava».

Člen savieta respubliki (2000–2008). U 2003 u Akademii navuk abaraniŭ kandydackuju dysiertacyju «Rehulavańnie ahrarnych adnosin va ŭmovach transfarmacyjnaj ekanomiki Respubliki Biełaruś». U 2010 byŭ členam inicyjatyŭnaj hrupy pa vyłučeńni Łukašenki kandydatam u prezidenty.

* * *

«Mažejkava» — adno z najbujniejšych sielskahaspadarčych pradpryjemstvaŭ krainy.

Tam zajmajucca harodninaj, žyviołahadoŭlaj, vytvorčaściu harełki.

U 2005 «Mažejkava» stała pieramožcam «Dažynak». Praŭda, u 2013 «Mažejkava» pierajšło ŭ katehoryju stratnych. Zapazyčanaść pa kredytach składała 88 miljardaŭ rubloŭ.

Novy kiraŭnik pradpryjemstva — Piotr Roŭba.

• 0
• 0
• 0
• 0
• 0
• 0
• 0
• 0