 |
15 studzienia kiraŭniki pratestanckich denaminacyj padpisali zvarot da kiraŭnika Administracyi prezydenta Hienadzia Niavyhłasa i ministra adukacyi Alaksandra Radźkova, u jakim vykazali zakłapočanaść tym, što «administracyja navučalnych ustanovaŭ prymušaje navučencaŭ u abaviazkovym paradku ŭstupać u hramadzkija arhanizacyi, u pryvatnaści ŭ Biełaruskuju respublikanskuju pijanerskuju arhanizacyju (BRPA) i Biełaruski respublikanski sajuz moładzi (BRSM)». Nahodaj dla takoha zvarotu stali častyja skarhi viernikaŭ i ich dziaciej na dziejańni administracyjaŭ navučalnych ustanovaŭ.
«Historyja niadaŭniaha minułaha našaj krainy śviedčyć, što takija metady pracy ź dziećmi i moładździu absalutna nieprymalnyja siońnia. Padtrymlivajučy palityku dziaržavy ŭ patryjatyčnym vychavańni budučaha pakaleńnia, my ščyra namahajemsia vychoŭvać svaich synoŭ i dačok, a taksama našych viernikaŭ dobrasumlennymi hramadzianami Biełarusi, što lubiać svaju krainu i svoj narod. Ale ni my, ni našy dzieci nie žadajem mieć ničoha supolnaha z arhanizacyjami — duchoŭnymi spadkajemcami raniejšych kamunistyčnych ateistyčnych sajuzaŭ.
My ličym, što hvałtoŭny zapis u padobnyja arhanizacyi parušaje pryncypy dobraachvotnaści, raŭnapraŭja i demanapalizacyi, što źjaŭlajucca asnovatvorčymi ŭ respublikanskaj prahramie «Moładź Biełarusi». Akramia taho, fakty zapałochvańnia našych dziaciej z‑za ichniaj admovy zapisvacca ŭ toje ci inšaje hramadzkaje abjadnańnie jość abrazaj dla nas i parušaje pryncypy Zakonaŭ RB «Ab pravach dziciaci», «Ab adukacyi RB», «Ab ahulnych pačatkach dziaržaŭnaj moładzievaj palityki RB», «Ab dziaržaŭnaj padtrymcy moładzievych i dziciačych hramadzkich abjadnańniaŭ u RB» — havorycca ŭ zvarocie.
Kiraŭniku Administracyi prezydenta, ministru infarmacyi, hałoŭnamu redaktara hazety «Sovietskaja Biełoruśsija» i staršyni Biełteleradyjokampanii pratestanty nakiravali list z zaklikam spynić u presie i na telebačańni reklamu akultnych praktykaŭ i vieravańniaŭ.
U zvarocie adznačajecca: «My ŭpeŭnienyja, što niezdarovaja zacikaŭlenaść zamahilnym śvietam, paturańnie i navat spryjańnie raspaŭsiudu čaraŭnictva siarod nasielnictva — heta tryvožny znak duchoŭnaj dehradacyi našaha hramadztva, strata im tradycyjnych chryścijanskich kaštoŭnaściaŭ».
Pad zvarotami padpisalisia japiskap «Abjadnanaj Carkvy chryścijanaŭ viery evanhielskaj» S.S. Chomič, japiskap «Sajuzu evanhielskich chryścijanaŭ baptystaŭ» N.V. Sinkaviec, japiskap «Kanferencyi Cerkvaŭ Chryścijanaŭ Adventystaŭ Siomaha Dnia» M.I. Astroŭski, japiskap Abjadnańnia hramadaŭ Chryścijanaŭ poŭnaha Evanhiella U.Ł. Hančarenka.
