Jak biełaruskija bamžy rabavali maskvičoŭ pad vyhladam palicejskich

Jak viadoma, u Rasii nabyć vajskovuju abo palicejskuju formu i amunicyju ŭ kramach «Vojentorh» moža kožny. Heta i stała sapraŭdnaj załatoj žyłaj dla troch bamžoŭ ź Biełarusi.

Sabraŭšy patrebnuju sumu, troje mužčyn, jakija načavali ŭ kabinkach hramadskaj prybiralni Biełaruskaha vakzała, pačali zusim novaje žyćcio, staŭšy «palicejskimi», paviedamlaje Lenta.ru.

Dziŭna, ale pry vybary pasad i zvańniaŭ biełaruskija bamžy prajavili ścipłaść: dvoje ź ich pryšyli da formy znaki i pahony staršych lejtenantaŭ, a treciaha mužčynu bujnoha ciełaskładu zrabili «supracoŭnikam AMAPa».

Paśla hetaha troje biełarusaŭ «zastupili na słužbu», pačaŭšy banalna rabavać rasiejcaŭ pad vyhladam supracoŭnikaŭ transpartnaj palicyi. U jakaści achviar pieraapranutyja ŭ palicejskich biełaruskija bamžy, jak praviła, vybirali prosta apranutych hramadzian, jakich advodzili ŭ zacišnyja miescy na Biełaruskim vakzale Maskvy i prylehłych vulicach «dla pravierki dakumientaŭ».

Pašparty paciarpiełym zatym viartali, a voś mabilnyja telefony i hrošy pakidali sabie, pahražajučy pry hetym «pasadzić u turmu». Dziŭna, ale rasiejcy pakorliva addavali «palicyjantam» svaju niachitruju majomaść i nikudy nie skardzilisia.

Nieŭzabavie «zarabiŭšy» rabavańniami peŭnuju kolkaść hrošaj, «palicejskija» vyrašyli palepšyć svaje žyllovyja ŭmovy. Z kabinak hramadskaj prybiralni Biełaruskaha vakzała Maskvy jany pierabralisia ŭ padvał raźmieščanaha niedaloka ad doma i praciahnuli rehularnyja zaniatki złačynnaj zdabyčaj.

Nieviadoma, kolki b jašče praciahvałasia pryvolnaje žyćcio biełaruskich bamžoŭ, pierapranutych u rasijskich palicejskich, ale sustreŭsia na ich šlachu 1 lutaha pryncypovy ruski. Mužčyna, jakoha biełarusy «nadhledzieli» nočču ŭ kafe na Vialikaj Hruzinskaj vulicy ŭ Maskvie, adabraŭšy ŭ jaho mabilny telefon i 13000 rasijskich rubloŭ, akazaŭsia adzinym z sotniaŭ paciarpiełych, chto nie staŭ mirycca z «samaŭpraŭstvam» i pryjšoŭ pa dapamohu ŭ adździaleńnie palicyi, dzie napisaŭ adpaviednuju zajavu.

Infarmacyja ab źjaŭleńni ŭ rasijskaj stalicy čarhovych piarevaratniaŭ u pahonach była pieradadziena ŭ HUUS Maskvy na Piatroŭku, 38. Apieratyŭniki «hłaŭka» ŭzialisia za pravierku ŭsich palicejskich, jakija pracujuć na Biełaruskim vakzale i prylehłych terytoryjach. A nieŭzabavie ŭ sklepie doma na Vialikaj Hruzinskaj ŭdałosia zatrymać i sapraŭdnych rabaŭnikoŭ.

U pracesie śledstva vyśvietliłasia, što troje biełarusaŭ, pakinuŭšy doma žonak i dziaciej, pryjechali ŭ Maskvu na zarobki. U dvuch ź ich na radzimie byli sudzimaści za kradziažy. Adzin biełaruski psieŭdamilicyjanier spačatku uładkavaŭsia pracavać u maskoŭski aŭtaservis, ale potym zrazumieŭ, što žabravańniem i kradziažom ŭ padpitych pasažyraŭ možna zarabić našmat bolš.

U ciapierašni čas apieratyŭniki sprabujuć vyjavić ŭsich paciarpiełych ad dziejnaści bamžoŭ-palicejskich. Nie vyklučana, što havorka moža iści pra sotni achviar. Taksama ŭ HUUS Maskvy pasprabujuć vyśvietlić, čym zajmalisia na Biełaruskim vakzale sapraŭdnyja pravaachoŭniki, kali taki doŭhi čas nie zaŭvažali dziejnaść svaich falšyvych «kalehaŭ».

• 0
• 0
• 0
• 0
• 0
• 0
• 0
• 0