100%: sanepidsłužba pravieryła 230 handlovych abjektaŭ i ŭ kožnym znajšła parušeńni
Za studzień sanitarna-epidemijałahičnaja słužba stalicy pravieryła 230 pradpryjemstvaŭ handlu.
U 100% vypadkaŭ ustanoŭleny tyja ci inšyja parušeńni. Pra heta siońnia paviedamiła hałoŭny dziaržaŭny sanitarny doktar horada Natalla Žukava na apieratyŭnaj naradzie ŭ Minskim haradskim vykanaŭčym kamitecie.
U liku asnoŭnych parušeńniaŭ — niezdavalniajučy sanitarna-techničny stan, nievykanańnie praviłaŭ zachoŭvańnia tavaraŭ, terminaŭ realizacyi i šerah inšych. Pa vynikach pravierak da administracyjnaj adkaznaści pryciahnuty 270 jurydyčnych i słužbovych asob. Ahulnaja suma štrafaŭ skłała krychu bolš za 1 młrd rubloŭ.
Prypyniałasia praca 51 handlovaha abjekta. Na siońniašni dzień 23 ź ich jašče nie adnavili dziejnaść.
Źniata z realizacyi 1.432 kh niedabrajakasnaj pradukcyi. Ź ich 740 kh — nie biełaruskaj vytvorčaści (nie dapuščanyja da prodažu pa vynikach łabaratornych daśledavańniaŭ i inšych pakazčykach).
«Hetaja praca praciahvajecca», — raspaviała Žukava.
U cełym, pa jaje słovach, prasočvajecca takaja tendencyja: u sanepidsłužby źviartajucca hramadzianie, śpiecyjalisty vyjazdžajuć na miesca i aceńvajuć situacyju. Ale, na dumku Žukavaj, pastajannyja parušeńni zakładzienyja ŭ samoj sistemie handlu. Havorka idzie pra pieratvareńnie kramy ŭ skład, asabliva kali jana raźmieščanv va ŭbudavanym ŭ žyły dom pamiaškańni. Heta vyklikaje pastajannyja abhruntavanyja skarhi žycharoŭ.
«Viadoma, miery my prymajem, sumy štrafaŭ vialikija, ale pry adnaŭleńni dziejnaści mahazinaŭ praź niejki čas situacyja paŭtarajecca, — adznačyła Žukava. — Naśpieła nieabchodnaść abmierkavańnia z kiraŭnikami handlovych pradpryjemstvaŭ vybudoŭvańnia łahistyki. Tak, zapłanavanaja narada z kiraŭnictvam adnoj z najbujniejšych handlovych sietak dla taho, kab vypracavać miery pa papiaredžańni ŭźniknieńnia parušeńniaŭ».
Piać faktaŭ pra Natallu Piatkievič — samuju ŭpłyvovuju čynoŭnicu Biełarusi da źjaŭleńnia Kačanavaj i Ejsmant24
Kamientary