Premiju «Załaty apostraf» atrymali Dubaviec, Silnova i Najdzionaŭ
9 lutaha ŭ minskim bary «DK» adbyłosia ŭhanaravańnie łaŭreataŭ litaraturnaj premii «Załaty apostraf»-2014.
Sioleta łaŭreatami premii, jakaja tradycyjna adznačaje najlepšyja publikacyi ŭ časopisie «Dziejasłoŭ» za hod i pravodzicca ŭžo ŭ dvanaccaty raz, stali: u paezii Ludka Silnova, u prozie Siarhiej Dubaviec, u naminacyi «Debiut» Mikita Najdzionaŭ. Śpiecyjalnaj premijaj Alesia Usieni za ŭniosak u raźvićcio sučasnaj biełaruskaj litaratury ŭhanaravany Narodny paet Biełarusi Nił Hilevič.
Uračystaja cyrymonija była arhanizavanaja HA «Sajuz biełaruskich piśmieńnikaŭ» i prajšła ŭ miežach hramadskaj kulturnickaj kampanii «Budźma biełarusami».
— Admietnaść sioletniaj premii ŭ tym, što nie abviaščałasia internet-hałasavanka, i redakcyja «Dziejasłova» sama abirała łaŭreataŭ, skłaŭšy adrazu šort-list, – raspavioŭ Staršynia HA «Sajuz biełaruskich piśmieńnikaŭ», hałoŭny redaktar časopisa «Dziejasłoŭ» Barys Piatrovič. — Za 12 hadoŭ isnavańnia «Załatoha apostrafa» byli ŭhanaravanyja kala saraka čałaviek. Pieršapačatkova było vyrašana, što łaŭreatam premii možna stanavicca tolki adzin raz. Adnak ciapier my bačym, nakolki cikavyja novyja tvory źjaŭlajucca ŭ našych niekali ŭžo ŭznaharodžanych aŭtaraŭ, i, mahčyma, z nastupnaha hoda my pamianiajem praviły. Chaciełasia b dadać, što adna z našych naminacyj – debiutnaja – nosić imia Anatola Sysa.
Viadučy viečara, adkazny sakratar časopisa «Dziejasłoŭ» Anatol Ivaščanka pradstaviŭ pieršaha namieśnika staršyni SBP Alesia Paškieviča, jaki abviaściŭ naminantaŭ premii ŭ halinie prozy.
Łaŭreatam staŭ Siarhiej Dubaviec za publikacyju «Vajna i mir. Spravazdača» ŭ № 71.
Muzyčnuju častku viečara skłali vystupleńni ŭdzielnikaŭ dziejasłoŭskaj Antałohii pierakładaŭ rasijskaj rok-paezii (№ 69).
Tak, hitaryst Arciom Sitnikaŭ, skrypačka Viktoryja Bukoŭskaja i flejtystka Bahdana Kutałoŭskaja vykanali pa-biełarusku pieśni Barysa Hrabienščykova.
Raman Jaraš praśpiavaŭ jak aŭtarskuju pieśniu, tak i muzyčnuju interpretacyju pa matyvach himna «Mahutny Boža». Tvorčaść BH pa-svojmu pieraasensavali ŭ supolnym vystupie Anatol Ivaščanka i Uładzimir Dryndrožyk.
Barys Piatrovič raspavioŭ hledačam pra stvareńnie samaha pieršaha numara časopisa «Dziejasłoŭ» i abvieściŭ łaŭreata «Załatoha apostrafa» ŭ halinie paezii – Ludku Silnovu (publikacyja ŭ № 69).
Paet, pierakładčyk, Staršynia Biełaruskaha PEN-centra, kolišni łaŭreat premii Andrej Chadanovič praśpiavaŭ «Arłandynu» i pieśniu Uładzimira Vysockaha pa-biełarusku.
Spadar Andrej zaprasiŭ usich na IV Mižnarodny paetyčny fiestyval imia Michasia Stralcova z udziełam haściej ź Litvy, Łatvii, Narviehii, Šviecyi, Ukrainy, Polščy, jaki startuje 12 lutaha. Vystupoŭca začytaŭ svaje pierakłady litoŭskaha paeta Hintarasa Hrajaŭskasa i ŭkrainskaha Sierhija Žadana, jakija nieŭzabavie pryjeduć na fest.
Śpiecyjalnaj premijaj Alesia Usieni za vialiki ŭniosak u raźvićcio sučasnaj biełaruskaj litaratury ŭhanaravany Nił Hilevič. Za Niła Symonaviča, jaki pa chvarobie nie zmoh pryjści, uznaharodu atrymaŭ jaho syn Siarhiej.
Na viečarynie taksama vystupili piśmieńniki, łaŭreaty «Załatoha apostrafa» roznych hadoŭ Aleś Bialacki, Anatol Viarcinski, Leanid Drańko-Majsiuk, Uładzimier Niaklajeŭ. Jakraz Uładzimier Prakopavič i abvieściŭ sioletniaha łaŭreata ŭ naminacyi «Debiut», paeta Mikitu Najdzionava (apublikavany ŭ № 73).
Naprykancy imprezy ŭsie žadajučyja zmahli atrymać časopisy «Dziejasłoŭ» z aŭtohrafami aŭtaraŭ.
Ciapier čytajuć
«Jany čamuści dumajuć, što ich zaraz zhvałciać». Prapahanda kinułasia tušyć abureńnie biełarusaŭ 150 tysiačami pakistancaŭ19
Kamientary