Dzicia ścipłaha kitajskaha nastaŭnika Džeka Ma — handlovaja placoŭka Aliexpress — stała nadzvyčaj papularnaj u biełarusaŭ.
Pavodle analityčnych dadzienych analizatara Alexa, Aliexpress zajmaje 12-je miesca pa naviedvalnaści ź Biełarusi. Heta nie dziva: na sajcie možna nabyć tavary, ceny na jakija ŭ Biełarusi značna vyšejšyja pry biadniejšym asartymiencie. Pakupki pry hetym jašče i biaspłatna dastaviać amal da paroha.
Ale kali mabilnyja telefony i inšyja rečy pieršaj nieabchodnaści nabytyja, nastupaje čas tavaraŭ dla dušy. A Aliexpress dapamoža lubomu i ŭ hetaj spravie. Navat tamu, chto nie ŭjaŭlaje žyćcia bieź bieł-čyrvona-biełaha ściaha i hierba «Pahonia» choć na čym. Tak, hetyja simvały nie vykarystoŭvajucca aficyjna, ale popyt na ich jość. A kitajcy — majstry zadavalniać popyt.
Usiaho za 15 dalaraŭ možna nabyć sabie vialiki (90 na 150 santymietraŭ) bieł-čyrvona-bieły ściah.
Možna zamović taki ž, tolki z «Pahoniaj» pasiaredzinie.
Jašče adzin varyjant — ściah z kryžom śviatoha Hieorhija i «Pahoniaj».
Jość i prosta «Pahonia» na čyrvonym fonie taho ž pamieru.
Značok na štryfiel pinžaka.
Isnujuć i bolš kampaktnyja varyjanty nacyjanalnaj simvoliki. Naprykład, mietaličny značok na štryfiel pinžaka ŭ vyhladzie kontura Biełarusi z naniesienym na jaho bieł-čyrvona-biełym ściaham. Taki varyjant padyjdzie dla amataraŭ aficynaha stylu adzieńnia i budzie dobra pasavać farmatu surjoznych sustreč. Adnak adzin značok nie kupić, možna zamović tolki partyju z 200 štuk za 316 dalaraŭ.
Bolš biudžetny varyjant — kruhłyja znački z konturam Biełarusi i BČB ściaham, 20 štuk za 18 dalaraŭ.
Samaja tannaja reč ź bieł-čyrvona-biełym ściaham — tkanievaja našyŭka. 10 štuk abyjducca ŭ 7,5 dalaraŭ.
Prezidencki štandar 120 na 120 santymietraŭ. Ci prynamsi jaho kopija.
A voś amataram ciapierašniaj dziaržaŭnaj simvoliki sapraŭdy jość dzie razharnucca. Možna zamović sabie prosty ściah, pryčym čyrvona-zialonaje pałotnišča 90 na 150 santymietraŭ abyjdziecca amal u dva razy tańniej za bieł-čyrvona-bieły ściah takoha samaha pamieru. Kampiekt sa 100 ściažkoŭ 14 na 21 santymietr abyjdziecca prykładna ŭ 20 dalaraŭ — chopić na ŭsich siabroŭ i znajomych. Dla samych ambicyjoznych pradajecca navat prezidencki štandar z załatym hierbam.
Znački, šeŭrony, našyŭki.
Dziŭny značok ź Miki Maŭsam pradajuć tolki vialikimi partyjami.
Jość i mietaličnyja znački na štryfiel — adrazu niekalkich vidaŭ, i zvyčajnyja znački, i našyŭki z šeŭronami. Adnak heta ŭsio davoli niearyhinalna.
Dla tych, chto sapraŭdy žadaje vyłučycca, pradajecca, naprykład, miedal «Hieroj Biełarusi». Załataja zorka na čyrvona-zialonaj stužcy kaštuje 68 dalaraŭ.
Sapraŭdnyja arystakraty aceniać elehantny kišenny miechaničny hadzińnik z vyjavaj hierba Biełarusi na nakryŭcy. Pradaviec prosić za jaho ŭsiaho 20 dalaraŭ, a zadavolenyja pakupniki pakidajuć 5-balnyja vodhuki.
Uładalniki iPhone mohuć zamović sabie čachły ź biełaruskim dziaržaŭnym ściaham — jany vypuskajucca ŭ niekalkich varyjacyjach i kaštujuć litaralna ničoha.
Niezvyčajna vyhladajuć i srebnyja pacierki 925-j proby z čyrvona-zialonym ściaham — 14 dalaraŭ za štuku.
Dla zaviaršeńnia vobrazu padyjduć pierfaracyjnyja akulary ź dziaržaŭnym ściaham — 15 dalaraŭ za partyju z 5 štuk.
Nie abminuli ŭvahaj kitajskija vytvorcy i tych, chto sumuje pa savieckich časach. Na sajcie Aliexpress možna nabyć kišenny hadzińnik ci futbołku z vyjavaj hierba BSSR. A voś pra Alaksandra Łukašenku zabylisia — na ŭsim Aliexpress niama nivodnaj rečy ź jaho vyjavaj. Vidać, usie vytvorčyja mahutnaści zaniaty vypuskam tavaraŭ z Pucinym, jakich pradajecca bieźlič.
