Sudovaja kalehija pa hramadzianskich spravach Minskaha haradskoha suda 19 lutaha admoviła ŭ zadavalnieńni kasacyjnaj skarhi pravaabaroncy Aleny Tankačovaj na rašeńnie ab jaje vysyłcy ź Biełarusi.
Heta byŭ apošni etap abskardžańnia, jaki dazvalaŭ Tankačovaj zastavacca ŭ krainie. Da 21 lutaha jana pavinna pakinuć Biełaruś.
Nahadajem, 5 listapada minułaha hoda UUS Pieršamajskaha rajona Minska pradpisała Tankačovaj na praciahu miesiaca pakinuć Biełaruś i zabaraniła joj naviedvać krainu najbližejšyja try hady. Padstavaj dla takoha rašeńnia stali zafiksavanyja videakamierami fakty niaznačnaha pieravyšeńnia chutkaści aŭtamabilem, jaki naležyć Tankačovaj.
Pravaabaronca hetaje rašeńnie abskardziła. Praces abskardžańnia praduhledžvaje prypynieńnie pradpisańnia ab vysyłcy na try miesiacy — pa miesiacy na abskardžańnie ŭ kožnaj z praduhledžanych instancyj.
12 śniežnia pravaabaroncy admovili ŭ zadavalnieńni skarhi ŭ pieršaj instancyi — HUUS Minharvykankama. 13 studzienia anałahičnaje rašeńnie vynies sud Pieršamajskaha rajona Minska.
Hramadzianka Rasii Alena Tankačova žyvie ŭ Biełarusi prykładna 30 hadoŭ. Na praciahu 20 hadoŭ Tankačova i Centr pravavoj transfarmacyi, jaki jana ŭznačalvaje, akazvajuć prafiesijnuju jurydyčnuju i ekśpiertnuju padtrymku niekamiercyjnym arhanizacyjam Biełarusi, a taksama ŭ situacyjach z parušeńniami pravoŭ čałavieka.
Hramadskija aktyvisty sabrali siem tysiač podpisaŭ pad prośbaj nie vysyłać Tankačovu z krainy. Pradstaŭniki hramadzianskaj supolnaści ličać dziejańni ŭład niepraparcyjanalnaj i palityčna matyvavanaj sankcyjaj, źviazanaj z prafiesijnaj dziejnaściu pravaabaroncy. A niekatoryja miarkujuć, što rašeńnie ab vysyłcy Aleny Tankačovaj pa značnaści paraŭnalnaje z aryštam adnaho ź lidaraŭ pravaabarončaha ruchu Biełarusi Alesia Bialackaha.
