Pačałasia viasna, usie kramy raspradajuć svoj zimovy asartymient, i my vyrašyli daviedacca, dzie mahčyma kupić švedar ci zimovuju kurtku pa nizkich koštach. Pahladzim, što adbyvajecca z koštami ŭ ipešnikaŭ, u kramach z mass-markietam i ŭ dziaržaŭnych. Spačatku idziom u «Siłuet»: niahledziačy na niezrazumiełaści z dakumientami dy zakonami, bolšaść pradprymalnikaŭ pracuje.
Pačynajem ź zimovych kurtak. Ich u siaredzinie sakavika zastałosia nie tak šmat, ale kali pastaracca, to całkam realna znajści svoj pamier. Tak, u niekatorych kropkach kurtku možna nabyć za 500 tysiač: pry hetym jana budzie z puchu dy sa štučnym futram na kaŭniery. Možna znajści i maleńkija, i vialikija pamiery. Na cetlikach «kraina ŭvoza» paznačanaja Rasija. Kali chočacca puchavik z naturalnym futram, to pryjdziecca zapłacić 850 tysiač.
Źleva — puchavik sa štučnym futram, kaštuje 500 000.
Ź zimovym abutkam spravy troški horš: vybar nie taki vialiki. Ale my znajšli niekalki kropak, dzie zimovyja žanočyja čaraviki sa štučnaj skury buduć kaštavać usiaho 250 tysiač, abutak sa skury ci nubuku – ad 650. Ulubionyja moładzievyja čaraviki Timberland zaraz u «Siłuecie» kaštujuć taksama 650 tysiač.
U niekatorych ipešnikaŭ ciapier źnižki nie tolki na zimovy, ale i na viasnovy abutak: zamšavyja žanočyja čaraviki ź minułahodnich zapasaŭ kaštujuć 450-500 tysiač, ale ich zastałosia niašmat. Pradavačka z kramy abutku tłumačyć, što asabista jana nie śpiašajecca jechać za novym tavaram, tamu što situacyja z zakonam ab prodažy nie zusim zrazumiełaja i ciažka pradkazać, jak źmieniacca umovy i košty. Mahčyma, jechać za novaj partyjaj budzie ŭžo nievyhadna.
Rasprodaž abutku, što zastaŭsia ź minułaha siezonu — ciapier hetyja čaraviki kaštujuć na 100 tysiač mienš.
Akramia źnižak na zimovyja rečy časam traplajucca i źnižki na viasnovyja palito, taksama minułahodnija. Tak, žanočaje palito z voŭny sa źnižkaj budzie kaštavać prykładna 1 000 000 ci troški bolš, a «novaja kalekcyja», to bok pryvoz 2015 hoda, - ad 1 700 000. Usie hetyja palito pryvoziać z Rasii.
Rasprodaž viasnovych palito z voŭny, vytvorca — Rasija.
Heta — novy pryvoz, adroźnivajecca ad minułaha siezonu tolki madelami.
Švedary i džempiery pa nizkich koštach u «Siłuecie» sustrakajucca nie tak časta, ale časam na niekatorych raletach visiać nalepki «źnižka 20%». U asnoŭnym heta bavaŭniana-akryłavy trykataž z Turcyi, kupić koftu ci švedar možna za 250-300 tysiač, minułahodnija sukienki na rasprodažy kaštujuć stolki ž (košty na viasnovuju «kalekcyju» sukienak u ipešnikaŭ zaraz pačynajucca ad 600 000).
Džempiery — kala 250 000, sukienki na źnižkach 250 000 - 450 000.
Košty na novuju «kalekcyju» — 600 000 - 650 000 tysiač.
Moda na vyšyvanki dajšła navat da tureckich vytvorcaŭ — u adnoj z kramaŭ u «Siłuecie» možna nabyć voś taki žakiet (95% poliester, 5% ełastan, košt — 460 000).
Dalej špacyrujem u CUM, dzie apošnim časam taksama možna patrapić na źnižki. Ale tam prapanujuć nizkija košty tolki na asobnyja marki, i ich jašče treba pašukać. U salihorskaj fabryki «Kalinka», naprykład, možna znajści žanočuju błuzku ź viskozy koleru «karałavy zihzah» za 149 900. Na susiednim stendzie marka Blauz Fashion prapanoŭvaje padobnyja kašuli ŭžo za 500 tysiač. Sukienak pa 250 000 tut taksama nie znojdzieš: žanočyja trykatažnyja sukienki pačynajucca ad 350 000 i tolki ad 42 pamiera, i styl ich u asnoŭnym nie vytrymlivaje krytyki.
Błuza ad «Kalinki» za 149 900.
Źleva — błuzka za 573 800, sprava — 499 500, abiedźvie - biełaruskaha brenda Blauz Fashion.
Ale nie ŭsio tak błaha: na zimovuju pradukcyju słonimskaj marki Romgil u CUMie zaraz dziejničaje 35% źnižka. Naprykład, voś hety sintetyčny džempier (PAN 77%,PA 15%, voŭny - usiaho 8%) možna nabyć za 372 600, a džempier bieraściejskaj «Elemy» - za 316 850.
Źleva — «Elema» za 316 850, sprava — «Romgil» za 372 600, materyjał i tam, i tam — pieravažna sintetyka.
Dadatkovuju źnižku možna atrymać, kali pryjści ŭ peŭny dzień: to HUM, to CUM, to HC «Na Niamizie» pieryjadyčna prajaŭlajuć nievierahodnuju ščodraść dy adymajuć ad košta ŭsich niecharčovych tavaraŭ jašče 15%, tamu budźcie pilnyja: toj ža samy švedar moža abyścisia vam jašče tańniej užo ŭ hetuju subotu, 14 sakavika.
Ciapier pahladzim, što prapanujuć brendy mas-markieta. Zachodzim u «Stalicu», i adrazu ŭ vočy kidajucca nadpisy: «da –70%» dy «ciapier jašče tańniej!» Pravierym, što jašče zastałosia na paličkach.
U «Terranova», italjanskaha brenda, jaki šyje svajo adzieńnie pieravažna ŭ Azii, jašče zastałosia niekalki ciopłych zimovych palito, jakija možna nabyć za 400 tysiač. Jašče ŭ ich jość vialiki stend z džempierami, usie pa 69 900. Pobač visiać jašče paru madelaŭ pa 99 900. Jak zaŭždy, rečy pamieru S i M na takich rasprodažach źnikajuć pieršymi, ale kali pastaracca, to možna znajści i S, i XS roznych koleraŭ.
Stendy ŭ kramie «Terranova».
Takija ž hory trykatažu možna znajści i ŭ Jack&Jones: zimovaja žanočaja kalekcyja ad Vero Moda prapanuje džempiery pa 339 900. U ich užo źjavilisia viasnovyja palito, u adroźnieńni ad rasijskich z «Siłueta», jany kaštujuć 929 200, zroblenyja ŭ Kitai i majuć u sabie 70% bavoŭny dy 20% poliestru. Dla paraŭnańnia: u Mango zaraz visiać viasnovyja palito za 1 129 900, u jakich poliestru 99% i 1% ełastanu.
Rasprodaž džempieraŭ ad Vero Moda.
Źleva — palito z novaj kalekcyi, bavoŭna+poliestr, u Biełarusi takoje možna nasić chiba poźniaj viasnoj.
U Jennyfer zaraz rasprodaž žanočych błuzak: jość pa 199 900 i pa 259 900. Ź zimovaj vierchniaj vopratki ŭ ich zastałosia bahata moładzievych parak, pieravažna koleru «chaki». Zroblenyja jany ŭ Kitai i kaštujuć 589 900.
Rasprodaž błuzak u Jennyfer.
Parki Jennyfer.
U Mexx zimovyja palito z taho ž Kitaju kaštujuć 1 499 900, skład – 100% PE. Na cetliku zakreśleny košt 2 799 900, to bok u sakaviku ŭ hetaj kramie možna niadrenna sekanomić. Džempiery tam jość i z novaj, i sa staraj kalekcyj. Minułahodnija – pa 599 900 zamiest 800 000, novyja – kala 999 900.
Zimovaje palito Mexx, jakoje pa viaśnie patańnieła na 1 300 000.
Źleva — džempier z novaj kalekcyi za 999 900, sprava — sa źnižkaj, ciapier kaštuje 599 900.
Samyja tannyja švedary znajšlisia ŭ kramie rasijskaj marki «Tvojo», jakaja pradaje ŭ asnoŭnym adzieńnie dla domu. Pamiž paličak z trykatažnymi majkami lubych koleraŭ dy pamieraŭ visić džempier «Sakret». Pavodle etykietki, jaho zrabili ŭ Banhładešy i raniej jon kaštavaŭ 243 900, a ciapier – usiaho 81 900.
Džempier «Sakret» marki «Tvajo». Cikava, što na cetliku paznačany taksama košt u rasijskich rublach — 599 r. (135 000). Peŭna, stolki jon kaštuje bieź źnižki ŭ susiedniaj dziaržavie.
Takim čynam, abrać pakul jość z čaho, tamu jašče možna paśpieć abnavić svoj zimovy harderob pa davoli pryjemnych koštach. Uličvajučy, što kurs zamiežnaj valuty raście, a ŭmovy dla indyvidualnych pradprymalnikaŭ źmianiajucca, tańniej palito dy abutak u nastupnym siezonie dakładna nie buduć.
