Fota Vitala Palinieŭskaha, catholic.by
Mitrapalit Minski i Zasłaŭski Pavieł, patryjaršy ekzarch usiaje Biełarusi, 13 sakavika ŭ Minsku abmierkavaŭ ź dziaržaŭnym sakratarom Śviatoha prastoła kardynałam Pjetra Paralinam pytańni ŭzajemadziejańnia Ruskaj pravasłaŭnaj Carkvy z Rymska-katalickaj. Pra heta paviedamlaje catholic.by.
Paśla sustrečy z pradstaŭnikom Vatykana mitrapalit Pavieł adznačyŭ, što siońnia ŭ pravasłaŭnaj carkvy i katalickaha kaścioła «šmat tem dla abmierkavańnia, dla razvažańniaŭ». «My nie havorym pra ekumienizm, pra ekumienistyčnaje zbližeńnie. Siońnia jak Ruskuju pravasłaŭnuju carkvu, Biełaruskuju pravasłaŭnuju carkvu, tak i Rymska-katalicki kaścioł — usich chvaluje sapraŭdnaje stanovišča rečaŭ, chvaluje pytańnie zachavańnia duchoŭna-maralnych kaštoŭnaściaŭ», — skazaŭ pravasłaŭny ijerarch.
Duchoŭnyja kaštoŭnaści, pavodle słoŭ mitrapalita Paŭła, źjaŭlajucca asnovaj žyćcia biełaruskaha hramadstva, pakolki jany — «abvieščanaja Boham praŭda, i naša zadača ich zachavać».
Padčas sustrečy z kardynałam Paralinam havorka išła i pra toje, što «pravasłaŭnaja carkva i katalicki kaścioł siońnia robiać usio mahčymaje, kab zachavać mir». «Biełaruś i Rasija siońnia — jarki prykład dobraha suisnavańnia roznych vieravyznańniaŭ u miry i zhodzie. My taksama adznačyli ciažki ŭrok, jaki daje Ukraina. Mir krochki, i my pavinny jaho zachavać», — dadaŭ pradstajaciel Biełaruskaha ekzarchata Ruskaj pravasłaŭnaj carkvy.
Nahadajem, kardynał Pjetra Paralin znachodzicca ŭ Biełarusi z 12 pa 15 sakavika z aficyjnym vizitam pa zaprašeńni biełaruskich uład. Heta druhi taki vizit pradstaŭnika Vatykana ŭ historyi sučasnaj Biełarusi paśla 2008 hoda, kali krainu naviedaŭ dziaržsakratar Śviatoha prastoła kardynał Tarčyzia Biertonie.
