Ukrainskija daktary sprabavali patrapić da Nadziei Saŭčanki ŭ maskoŭski SIZA «Matroskaja cišynia» 13 sakavika. Adnak tady ich admovilisia puścić z-za adsutnaści adobranych rasijskim MZS dakumientaŭ.
Siońnia, 14 sakavika, kansilium ŭsio ž taki adbyŭsia.
«Damoŭlenaść ab tym, što ich u joj dapuściać z rasiejskaha boku ranicaj u čaćvier paćvierdziła [Upaŭnavažany pa pravach čałavieka ŭ Rasii] Eła Pamfiłava. Uvieś učorašni dzień jany biezvynikova praviali kala bramy SIZA, pakolki akazałasia, što pa linii MZS niešta niedosohłasovano… Treba addać Pamfiłavaj naležnaje — jana pryznała svaju adkaznaść za zatrymku i vybačyłasia, heta pryjemna kantrastuje z pavodzinami inšych rasijskich słužbaŭ», — paviedamiŭ siońnia advakat Illa Novikaŭ.
Eła Pamfiłava paviedamiła, što ŭkrainskija daktary znachodzilisia ŭ Nadziei Saŭčanki try z pałovaj hadziny, pieradaje lenta.ru sa spasyłkaj na «Interfaks».
«Vysnovy pa vynikach naviedvańnia ŭkrainskija daktary abnarodujuć sami», — skazała Pamfiłava.
Pradstaŭnica Ministerstva achovy zdaroŭja Ukrainy Natalla Charčanka paviedamiła, što ŭkrainskija miedyki padrabiazna vyvučyli dakumienty, pahutaryli z rasijskimi lekarami. «U cełym my byli ŭ SIZA, dzie ŭtrymlivajecca Nadzieja, 5 hadzin. Na momant ahladu stan u jaje było zdavalniajučym. Jana vielmi mužna trymajecca», — cytuje RBK-Ukraina sa spasyłkaj na pres-słužbu «Baćkaŭščyny».
«Uvieś čas vychadu z haładańnia — a heta stolki ž, kolki doŭžyłasia samo haładańnie, — Nadzieja pavinna znachodzicca ŭ balnicy pad nahladam miedykaŭ», — adznačyła Charčanka.
Advakat Mark Fiejhin u razmovie z «Kommiersant FM» adznačyŭ, što Saŭčanka adčuvaje siabie kiepska.
«U jaje nizki cisk, vostryja boli, źviazanyja z pankreatytam, i hetak dalej. Heta značyć usio-tki stan taki, što, viadoma, joj rekamiendavana było b pieramiaścicca ŭ niejkuju hramadzianskuju balnicu», — zajaviŭ Fiejhin.
Hieroj Ukrainy, deputat PASIE Nadzieja Saŭčanka znachodzicca pad aryštam ź leta 2014 hoda. Na pačatku sakavika jana pačała vychad z praciahłaj haładoŭki. Pavodle rekamiendacyj daktaroŭ jana pačała prymać kuryny bulon, a potym pierajšła na zbałansavanaje charčavańnie z sokaŭ i aharodninnaha piure.
