Zahadčyca adździełu pryvatyzacyi Taciana Manionak i zahadčyk adździełu tavarnych rynkaŭ Alaksandar Alesin padali zajavy ab zvalnieńni.
Taciana Manionak raspaviała, što hety krok byŭ čakanym:
— My vyrašyli ŭsio heta rabić pastupova, kab heta nie było niejkim demaršam. Spačatku čakali reakcyi ad ułaśnika, što jon adreahuje na sychod pieršaj čarhi našych žurnalistaŭ. Kali nia budzie pieraškodaŭ dla našaj pracy, my vierniemsia. My ž lubim svaju hazetu i chočam pracavać. Heta prosta krok adčaju. Ja skazała redaktaru Valancinie Vieštart, što ŭ hetaj sytuacyi samaje kanstruktyŭnaje — heta pajści ŭ adstaŭku. Bo jak možna pracavać, kali ŭvieś kalektyŭ joj nie daviaraje? A samaje hałoŭnaje ciapier — zachavać hazetu.
Raniej zajavy padali namieśnica hałoŭnaha redaktara Iryna Kryłovič, adkazny sakratar Jury Siezień, finansavy ahladalnik Uładzimier Tarasaŭ, zahadčyk adździełu nieruchomaści Palina Lehina, zahadčyk adździełu kultury Hanna Ždanovič i karespandent Alaksiej Alaksandraŭ.
Kryzis u redakcyi hazety «Biełorusy i rynok» byŭ vyklikany źmienaj składu akcyjaneraŭ ZAT «Medyjarynak», jakoje vystupaje zasnavalnikam štotydniovika «Biełorusy i rynok».
Stvaralnik, raspracoŭnik kancepcyi i hałoŭny redaktar Viačasłaŭ Chadasoŭski, jaki kiravaŭ hazetaj ciaham 25 hadoŭ jaje isnavańnia, pradaŭ bolšuju častku svaich akcyjaŭ niekalkim pryvatnym asobam, u liku jakich — hiendyrektar «Eŭraradyjo» Źmicier Novikaŭ. Novyja akcyjanery pryznačyli novaha hałoŭnaha redaktara — byłuju redaktarku časopisa «Biełorusskoje sielskoje choziajstvo» Valancinu Vieštart. Sam Viačasłaŭ Chadasoŭski atrymaŭ pasadu šef-redaktara.
Kalektyŭ redakcyi apublikavaŭ adkryty zvarot da akcyjaneraŭ «Medyjarynku», u jakim vykazaŭ niedavier hałoŭnamu redaktaru. Paśla hetaha hałoŭny akcyjaner «Medyjarynku» Źmicier Novikaŭ u interviju Radyjo Svaboda zajaviŭ, što nie źbirajecca zvalniać Vieštart, i paabiacaŭ dziejničać žorstka.
— Sprava ŭ tym, što ŭ hazecie sapraŭdy jość hrupa vielmi mocnych ekspertaŭ, analitykaŭ, jakija ličacca lepšymi ŭ peŭnych halinach. Da prykładu, vajskovy ahladalnik Alaksandar Alesin, ekspert u naftahazavaj, enerhietyčnaj halinie Taciana Manionak. Im, možna ŭpeŭniena skazać, niama roŭnych. I vielmi b chaciełasia, kab hetyja ludzi i dalej pracavali. I ź imi vialisia i viaducca pieramovy, — skazaŭ tady Źmicier Novikaŭ. — Ale doŭha ŭhavorvać nichto nikoha nia budzie, — dadaŭ jon.
