Ad padatku nie ŭciačeš. Dziaržava zakryvaje zakanadaŭčyja dziry dla «darmajedaŭ»

Jak tolki Łukašenka padpisaŭ dekret №3 ab abaviazkovym zbory z «darmajedaŭ», u internecie stali abmiarkoŭvać, jak zakon buduć abychodzić tyja, chto farmalna nie pracuje, ale i płacić 20 bazavych vieličyń u biudžet nie choča.

Adnak zadumalisia pra heta nie tolki hramadzianie, ale i dziaržorhany, jakija sprabujuć zakryć usie zakanadaŭčyja dzirki dla patencyjnych utrymancaŭ.

Chutka stać ramieśnikam nie atrymajecca

U dekrecie adznačana, što ramieśniki, jakija zapłacili zbor (adna bazavaja vieličynia u hod), nie buduć ličycca darmajedami.

Adnak zapłacić jaho treba na hod napierad i nie paźniej za 28 čysło apošniaha miesiaca kalandarnaha hoda. To bok, kali vy chočacie zajavić pra ramiesnaj dziejnaści ŭ 2015-m, unieści 180 tysiač rubloŭ u biudžet treba było da 28 śniežnia 2014 hoda.

Kali ramieśnik sam pradaje svaje pracy, jaho hadavy dachod pavinien być nie mienš za 20 bazavych vieličyń, inakš treba budzie zapłacić padatak na darmajedstva.

Biespracoŭnym možna być tolki adzin hod

U bližejšy čas płanujuć unieści źmieny ŭ zakon «Ab zaniataści nasielnictva Respubliki Biełaruś». Ciapier biespracoŭny moža znachodzicca ŭ hetym statusie 36 miesiacaŭ. Minpracy nastojvaje na skaračeńni terminu da 12 miesiacaŭ.

Pradprymalnik biez dachodu? Płaci padatak!

Nie ŭratuje ad vypłaty padatku na darmajedstva i rehistracyja ŭ jakaści indyvidualnaha pradprymalnika. Dekretam vyznačana, što hadavy dachod IP pavinien być nie mienš za 20 bazavych vieličyń (3,6 młn rubloŭ).

Toje ž samaje tyčycca ŭsich płacielščykaŭ adzinaha padatku: repietytaraŭ, pakajovak, nianiek, pastuchoŭ, muzykaŭ i viadučych mierapryjemstvaŭ, zavodčykaŭ i dresiroŭščykaŭ, pierakładčykaŭ, švačak, jakija zajmajucca ramontam i pierarobkaj hatovych vyrabaŭ, pradaŭcoŭ nasieńnia, rasady i dekaratyŭnych raślin.

Pamočnikaŭ haspadara ahrasiadziby mohuć pryniać za darmajedaŭ

U dekrecie vyrazna paznačana: haspadary sielskich siadzibaŭ nie adnosiacca da katehoryi darmajedaŭ. Adnak prosta mieć domik u vioscy niedastatkova.

Pa-pieršaje, u domie pavinny być svabodnyja pakoi, dzie možna pryniać turystaŭ. Pa-druhoje, haspadar siadziby pavinien pastajanna pražyvać u sielskaj miascovaści i pracavać tam. Paćvierdzić vaš status mohuć padpisanyja damovy z turystami, a taksama sielski vykanaŭčy kamitet.

Padatkovaja inśpiekcyja moža zapatrabavać ad uładalnika siadziby padać dekłaracyju ab dachodach. Kali dachody ŭ sto razoŭ pieravyšajuć atrymany za hod zbor, pryjdziecca dapłacić 10% ad sumy pieravyšeńnia. Takija ž miery raniej byli pryniatyja ŭ dačynieńni da ramieśnikaŭ i IP, jakija płaciać adziny padatak.

A voś členaŭ siamji, jakija dapamahajuć absłuhoŭvać turystaŭ, całkam mohuć pryznać darmajedami, kali haspadar nie zaklučyć ź imi damovu.

Niepłacielščykam zabaroniać vyjezd za miažu

Uciačy ad padatku na darmajedstva nielha navat za miažu. Niepłacielščykaŭ zboru buduć uklučać u śpisy nievyjaznych. Abmiežavańnie budzie vynosić sud.

Pa źviestkach MUS, płacielščykami zboru na finansavańnie dziaržvydatkaŭ mohuć stać kala 10 tysiač zamiežnikaŭ. U ciapierašni čas u Biełarusi pražyvajuć bolš za 165 tysiač zamiežnych hramadzian i asob biez hramadzianstva, jakija majuć dazvoł na žycharstva. Pa słovach padatkavikoŭ, praviarać buduć pierš za ŭsio tych, chto za hod zrabiŭ darahija pakupki.

• 0
• 0
• 0
• 0
• 0