Jak krali ŭ Biełkaapsajuzie

Abvinavačanyja Andrej Turčanka (źleva) i Siarhiej Sidźko. Fota Siarhieja Hudzilina

Sudziać adrazu šaściarych: užo byłych kiraŭnikoŭ Biełkaapsajuza i biznesoŭcaŭ. Adny, jak davodzić prakuror, brali chabar, druhija jaho pieradavali. U spravie fihurujuć sotni tysiač dalaraŭ.

Sudziać byłych kiraŭnika Biełkaapsajuza Siarhieja Sidźko, načalnika ŭpraŭleńnia kapitalnaha budaŭnictva Biełkaapsajuza Dźmitryja Kałodzieznaha i jaho namieśnicu Eleanoru Sizuk, namieśnika dyrektara firmy «Adonisbudservis» Uładzimira Lenskaha, dyrektara firmy «Sanata­Bud» Alaksandra Drańkova, hramadzianina Ukrainy Andreja Turčanku. Sidźko i Turčanka — za kratami, astatnija prychodziać na sud z domu.

Amatar viski ŭ ranhu ministra

Biełkaapsajuz — dziaržaŭnaja arhanizacyja, jakaja vałodaje vializnaj majomaściu pa ŭsioj krainie. Heta sietka kramaŭ i kaviarniaŭ, budaŭničyja i transpartnyja arhanizacyi i jašče šmat inšaha. Vialikaja biznes­-impieryja, u jakoj zaniata bolš za 80 tysiač čałaviek. A kiraŭnik hetaj «impieryi» pryraŭniany pa statusie da ministra.

Siarhieja Sidźko abvinavacili ŭ tym, što ŭ zmovie ź Dźmitryjem Kałodzieznym łabiravaŭ intaresy pryvatnych firm pry zaklučeńni damoŭ na budaŭnictva i ramont biełakaapsajuzaŭskich abjektaŭ. Za heta abodva atrymlivali hrošy ad udziačnych biznesoŭcaŭ.

Z 2010 pa 2013 Sidźko paspryjaŭ zaklučeńniu kantraktaŭ na budaŭnictva kram u Lidzie, Lubani, Žłobinie, na budaŭnictva chaładzilnaha składa ŭ Minsku, na ramont u vučebnych karpusach Połackaha handlova-­technałahičnaha kaledža. Heta tolki častka epizodaŭ. I kala dvuch dziasiatkaŭ sustreč, padčas jakich pieradavalisia hrošy — u sumie bolš za $100 tysiač. Kałodzieznamu pieradavali značna mienšyja sumy.

Hrošy pieradavalisia pry pasiarednictvie Lenskaha. A razam z hrašyma Lenski «ad siabie» pieradavaŭ Sidźko viski: pa adnoj, dźvie, try butelki. Ahułam nie mienš za 17.

Mulaž paŭmiljona dalaraŭ

Pavodle abvinavačvańnia, u 2011 Kałodziezny ŭstupiŭ u zmovu z Andrejem Turčankam. Prapanavaŭ ukraincu znajści pakupnikoŭ na abjekty Biełkaapsajuza: administratyŭny budynak na vulicy Tatarskaj, dziciačy sadok na Partyzanskim praśpiekcie ŭ Minsku i dziciačy łahier u Minskim rajonie. Ale była ŭmova: pakupnik musiŭ častku hrošaj apłacić praz bank, a reštu addać hatoŭkaj.

Turčanka sam dać rady ŭ takoj spravie nie zmoh i źviarnuŭsia da supracoŭnicy ahienctva pa nieruchomaści Braździeckaj: paabiacaŭ uznaharodu za pošuk klijenta. Jana i adšukała — kampaniju «BiełŁPZ». Za budynak na Tatarskaj pakupnik musiŭ $1,1 miljona pieraličyć na rachunak Biełkaapsajuza, a $500 tysiač pieradać na ruki dla chabaru. Turčanka tady uziaŭ $5000 zadatku, a reštu pakupniki pakłali u bankaŭskuju jačejku — nibyta dla harantyi. Jak vynikaje, biznesoŭcy źviarnulisia ŭ KDB. I kali kłali hrošy ŭ bank, heta byŭ mulaž — niesapraŭdnyja dalary. A paśla, u lipieni 2013, prajšli aryšty.

Braździeckuju, miž inšym, taksama buduć sudzić. Spačatku jaje spravu źbiralisia razhladać asobna, ale sudździa vyrašyŭ dałučyć da hetaj. Z nastupnaha pasiadžeńnia łava abvinavačanych papoŭnicca.

Kansultavała za hrošy

Roli astatnich abvinavačanych u hučnaj spravie nie takija prykmietnyja. Alaksandr Drańkoŭ, na toj čas dyrektar budfirmy, pieradavaŭ hrošy praź Lenskaha dla kiraŭnikoŭ Biełkaapsajuza. Za heta spadziavaŭsia atrymać patrebnyja zamovy.

Zusim ścipłym vyhladaje abvinavačańnie Eleanory Sizuk. Žančyna kansultavała biznesoŭcaŭ. Usio adbyvałasia ŭ miežach jaje paŭnamoctvaŭ, ale za heta atrymlivała hrošy — ahułam $1200. «Niezakonnaje ŭznaharodžańnie», — jak kvalifikuje prakuror. I tolki adzin epizod tyčycca niepasredna chabaru ŭ $1500: praspryjała chabaradaŭcu ŭ vyrašeńni jaho pytańnia.

«Raskajvajusia»

«Abvinavačańnie zrazumiełaje. Nie pryznaju całkam ni pa adnym z epizodaŭ», — zajaviŭ Siarhiej Sidźko. U ton jamu vymaviŭ i Drańkoŭ: «Abvinavačańnie nie pryznaju ŭ poŭnym abjomie».

Kałodziezny pryznaŭ, što hrošy braŭ, ale nikomu nie spryjaŭ. Lenski i Sizuk adpiracca nie stali.

Padrabiaznuju pazicyju kožnaha z abvinavačanych možna budzie pačuć tolki padčas ich dopytaŭ u pracesie.

***

Baćka niemaŭlaci

Dźmitryj Kałodziezny naradziŭsia ŭ 1976. Žanaty. Haduje synoŭ: adnamu 7 hadoŭ, druhomu paŭhoda. Ciapier pracuje majstram u budaŭničaj kampanii.

Vinavaciać u złoŭžyvańni słužbovymi paŭnamoctvami (da 6 hadoŭ kałonii); atrymańni chabaru (da 10 hadoŭ kałonii z kanfiskacyjaj); padbuchtorvańni da dačy chabaru (da 7 hadoŭ kałonii).

Uładkavałasia ŭ sienatara

Eleanora Sizuk naradziłasia ŭ 1969 u Taškiencie. Hramadzianka Biełarusi. Maje vyšejšuju adukacyju. Zamužam. Maje dvuch synoŭ. Ciapier pracuje ŭ «Amkador­Biełvar», jaki naležyć sienataru Šakucinu.

Vinavaciać u atrymańni chabaru (da 7 hadoŭ kałonii z kanfiskacyjaj); atrymańni niezakonnaha ŭznaharodžvańnia (da 5 hadoŭ kałonii).

Kupiŭ dom na Kanarach?

Siarhiej Sidźko naradziŭsia ŭ 1956 u Breście. Pracavaŭ na Bresckim zavodzie bytavoj chimii, byŭ staršynioj praŭleńnia Bresckaha abłspažyŭsajuza. U 2009 pryznačany kiraŭnikom Biełkaapsajuza. Žanaty. Maje syna i dačku.

«Dajšło da taho, što Sidźko kupiŭ i aformiŭ na dačku dom na Kanarskich astravach. Napeŭna, u spadziavańni, što pravaachoŭnyja orhany tam jaho nie dastanuć. Za prodaž budynka ŭ centry Minska patrabavaŭ chabar až u paŭmiljona dalaraŭ», — zajaviŭ letaś Łukašenka pra hetuju spravu. Praŭda, na sudzie dom na Kanarach pakul nie ŭspłyŭ.

Advakat chadajničaŭ, kab Sidźko źmianili mieru strymańnia albo vyzvalili pad zakład. U jakaści zakładu žonka prapanavała svaju trochpakajoŭku (67 m²) u Breście. Ale sudździa admoviŭ.

Sidźko vinavaciać u złoŭžyvańni słužbovymi paŭnamoctvami (pahražaje da 10 hadoŭ źniavoleńnia) i atrymańni chabaru (da 15 hadoŭ z kanfiskacyjaj).

Apytanka

• 0
• 0
• 0
• 0
• 0