U vyniku sumiesnych dziejańniaŭ Salihorskaha rajonnaha adździeła Śledčaha kamiteta i supracoŭnikaŭ adździaleńnia pa narkakantroli i supraćdziejańni handlu ludźmi Salihorskaha RAUS spyniena dziejnaść dvuch internet-mahazinaŭ pa prodažy spajsaŭ na terytoryi rehijonu.
Jak paviedamiła BiełaPAN aficyjny pradstaŭnik upraŭleńnia SK pa Minskaj vobłaści Taćciana Biełanohaja, padčas praviedzienych apieratyŭna-vyšukovych mierapryjemstvaŭ i śledčych dziejańniaŭ zatrymany asoby, jakija zajmajucca raspaŭsiudam narkotykaŭ i psichatropaŭ praź internet. Dziejnaść internet-kram ažyćciaŭlałasia 19-hadovym i 25-hadovym žycharami Salihorska ź piersanalnych mabilnych pryład. Realizacyja zabaronienych rečyvaŭ adbyvałasia šlacham zakładak. Hrošy, što pieraličvalisia na elektronnyja kašalki pakupnikami, narkahandlary pieravodzili ŭ najaŭnyja. Ich štomiesiačny dachod składaŭ bolš za 20 młn. rubloŭ.
U momant zatrymańnia ŭ padazravanych kanfiskavana amal paŭkiłahrama rečyvy raślinnaha pachodžańnia, jakoje ŭ svaim składzie ŭtrymlivaje asabliva niebiaśpiečnaje psichatropnaje rečyva MBA(N)-CHM. Heta ŭžo pryznačanyja dla prodažu 30 pakunačkaŭ ź psichatropami i jašče nie rasfasavanaje aznačanaje rečyva.
Padčas praviedzienych pieratrusaŭ pa miescy žycharstva fihurantaŭ byli ŭziatyja kamputarnaja technika, mabilnyja telefony, bankaŭskija kartki i inšyja rečavyja dokazy, jakija paćviardžajuć ich dačynieńnie da narkazłačynstvaŭ. Akramia taho, kanfiskavanyja hrašovyja srodki ŭ pamiery kala 25 młn. rubloŭ, zdabytych złačynnym šlacham.
Ciapier zatrymanym vystaŭlenaje abvinavačvańnie. Supraćpraŭnyja dziejańni kožnaha kvalifikavanyja śledstvam jak zbyt asabliva niebiaśpiečnych psichatropnych rečyvaŭ. U dačynieńni da ich prymieniena miera strymańnia ŭ vyhladzie zaklučeńnia pad vartu.
