Prezident Vieniesueły Nikałas Madura padaryŭ žycharcy krainy kvateru, paśla taho jak jana zapuściła jamu ŭ hałavu manha.
Marleni Aliva kinuła sadavinu ŭ kiraŭnika dziaržavy, kali toj u chodzie cyrymonii adkryćcia novaj transpartnaj sietki kiravaŭ aŭtobusam u štacie Ansaatehi na paŭnočnym uschodzie krainy.
Praź niekalki dzion padčas televizijnaha zvarotu Madura pakazaŭ hledačam manha, na jakim było napisana «Kali možacie, patelefanujcie mnie», a taksama numar telefona žančyny.
Madura skazaŭ, što jaho pamočniki ŭžo źviazalisia z Aliva i paabiacaŭ, što 54-hadovaj žančynie budzie pradastaŭlena kvatera ŭ ramkach prahramy raźvićcia masavaha žylla.
Madura skazaŭ, što frukt byŭ śpiełym, i paabiacaŭ paźniej jaho źjeści. Vieniesuelski lidar pažartavaŭ, što ŭ jaho jość niešta ahulnaje z manha, bo maduro pa-ispansku aznačaje «saśpieły».
Nikałas Madura, jaki pryjšoŭ da ŭłady ŭ 2013 hodzie paśla śmierci byłoha lidara Vieniesueły Uha Čaviesa, u minułym pracavaŭ kiroŭcam aŭtobusa.
Ciapierašni lidar łacinaamierykanskaj krainy niaredka sadzicca za rul i adpraŭlajecca ŭ miniturne pa nievialikich haradach, dzie razmaŭlaje z nasielnictvam.
U padobnych pajezdkach prezident źbiraje pietycyi, prośby, u asnoŭnym napisanyja na papiery, i słuchaje zvaroty hramadzian. 52-hadovy Madura, jak i jaho papiarednik Čavies, viadomy svaimi papulisckimi žestami i nie ŭ pieršy raz adorvaje prośbitaŭ.
U minułym vieniesuelskija lidary z panskaha plača davali biednym vieniesuelcam kvatery, nadbaŭki da piensij abo bytavyja prybory.
Śmiełaja vieniesuełka paźniej pryznałasia, što ŭ jaje pad rukoj nie było papiery, kab napisać prośbu tradycyjnym sposabam, tamu jana vyrašyła vykarystać dla hetaj mety manha.
Kamientary