Polšča nie ŭpuściła hrupu «Načnych vaŭkoŭ» na svaju terytoryju

Jak paviedamlaje karespandent «Našaj Nivy» z pamiežnaha pierachodu «Varšaŭski most» z Bresta, polski bok nie prapuściŭ hrupu z 10 rasijskich bajkieraŭ na svaju terytoryju. U Polšču prapuścili tolki adnaho rasijskaha bajkiera (Šeryfa), jaki skazaŭ, što da «Načnych vaŭkoŭ» nie naležyć.

Astatnich udzielnikaŭ motaprabiehu viarnuli ŭ Biełaruś. Žurnalisty i rasijskija dypłamaty čakali ich ź biełaruskaha boku miažy. Na rasijanach — hihanckaha pamieru hieorhijeŭskija stužki, z saboj — rasijskija trykałory. Bajkiery padjechali pad hučnamoŭnuju pieśniu «Dień Pobiedy».

Rasijanie raspaviali, što ich vizy nie byli anulavanyja, adnak na miažy im skazali «siońnia vy nie prajedziecie». Anulavali vizu tolki adnamu z arhanizataraŭ prabiehu — Andreju Babroŭskamu, jon uniesieny ŭ sankcyjny śpis. Pa słovach bajkieraŭ, na pamiežnym pierachodzie z polskaha boku prysutničaŭ uzbrojeny aŭtamatami śpiecnaz. Uvahu polskich pamiežnikaŭ asabliva źviarnuli savieckija ściahi, jakija byli ŭ mašynie supravadžeńnia. Palaki sfatahrafavali ich. Udzielniki motaprabiehu majuć namier abskardzić admovu va ŭjeździe, a siońnia miarkujuć adpačyvać u Breście.

Infarmacyju pra toje, što hrupie bajkieraŭ admoŭlena va ŭjeździe, paćviardžajuć polskija ŚMI.

Na pytańnie ab tym, ci naležyć adziny prapuščany bajkier da kłuba «Načnyja vaŭki», jon adkazaŭ: «Ja ź miemaryjału Słavy i Pieramohi». Z polskaha boku jaho sustrakali 30 polskich bajkieraŭ z ruchu «Katynski rejd», a taksama niekalki aktyvistaŭ prarasijskich arhanizacyj.

Pa słovach pradstaŭnika «Načnych vaŭkoŭ», jany zhubili ŭ hetaj pajezdcy razam 600 tys. rasijskich rubloŭ (11 500 dalaraŭ).

Jon zaznačaje, što ich vizy nie anulavanyja, prosta było skazana, što ŭjezd u krainu nie pažadany.

Bajkiery zaznačajuć, što nie viedajuć, što rabić dalej. Jany kažuć, što moža pasprabujuć jechać praź Litvu, abo praź Finlandyju.

Pradstaŭnik «Katynskaha rejdu» Viktar Vienhžyn u hutarcy z žurnalistami «Haziety vyborčaj» nazvaŭ polskija ŭłady «bandaj niaŭdačnikaŭ i zładziejaŭ». Jon zajaviŭ, što infarmacyju pra ŭdzieł «Načnych vaŭkoŭ» u anieksii Kryma mahli prydumać «chłuślivyja polskija miedyja».

Prykładna ŭ 15.40 bajkiery pačali adjazdžać ad miažy. Pa ich słovach, jany nakiravalisia da rasijskaha konsuła ŭ Breście, a zaŭtra ŭ konsulstvie RF a 12-j hadzinie adbudziecca ich pres-kanfierencyja.

Źviartaje ŭvahu, što razrekłamavany rejd rasijskich bajkieraŭ na Bierlin prachodzić biez razmachu, ułaścivaha «pachodam na Sievastopal» u hady, što papiaredničali zachopu paŭvostrava Rasijaj. U rejdzie na Bierlin pakul biaruć udzieł tolki 11 čałaviek na 10 matacykłach. Siarod ich — nivodnaha biełarusa.

Niešmatlikuju hrupu ŭčora na Kurhanie Słavy vitaŭ namieśnik kiraŭnika Administracyi prezidenta Ihar Buzoŭski pad dziaržaŭnymi ściahami. Paralelna ŭ Minsku byli arhanizavanyja ŭłasnabiełaruskija akcyi pamiaci vajny z udziełam matacyklistaŭ i pamočnika prezidenta pa nacyjanalnaj biaśpiecy Viktara Łukašenki.

• 0
• 0
• 0
• 0
• 0