Chutčej za ŭsio, Alaksandr Łukašenka nie pryjedzie ŭ Ryhu na samit Uschodniaha partniorstva, jaki projdzie 21-22 maja. Takuju zajavu zrabiła premjer Łatvii Łajmdota Straujuma, adznačyŭšy, što da hetaha času nie zrazumieła, chto budzie pradstaŭlać Biełaruś na hetym mierapryjemstvie, paviedamlaje Delfi.lv.
U svaju čarhu, udzieł u samicie paćvierdzili prezident Ukrainy Piatro Parašenka, prezident Armienii Sierž Sarhsian, prezident Azierbajdžana Ilcham Alijeŭ, prezident Małdovy Mikałaj Cimafci i premjer Hruzii Iraklij Harybašvili.
Raniej Łukašenka zrabiŭ zajavu, što Biełaruś vystupaje za źmienu farmatu Uschodniaha partniorstva, prapanoŭvajučy pierajści «ad ahulnapalityčnych pytańniaŭ da bolš ciesnaha ekanamičnaha ŭzajemadziejańnia», nahadvaje Delfi.
Nahadajem, što Rasija 24 krasavika rezka asudziła praviadzieńnie samitu UP u Ryzie, zajaviŭšy, što mierapryjemstva maje vidavočna antyrasijskuju nakiravanaść.
«My vielmi admoŭna stavimsia. My, viadoma, budziem sačyć za tym, jak budzie prachodzić samit u Ryzie, ale ŭžo vidavočna, što naša reakcyja budzie dastatkova žorstkaj i pryncypovaj, bo my bačym, kudy ruchajecca heta partniorstva i jakija adcieńni jano nabyvaje z ulikam pazicyj udzielnikaŭ hetaj prahramy z boku pierš za ŭsio ES», — zajaviŭ aficyjny pradstaŭnik MZS RF Alaksandr Łukaševič na bryfinhu ŭ Maskvie 24 krasavika.
«Pryncypova toje, što sens partniorstva maje jarka vyjaŭlenuju antyrasijskuju nakiravanaść», — padkreśliŭ jon.
U svaju čarhu prezident Łatvii Andrys Bierzińš zajaŭlaŭ, što hatovy pravieści aficyjnuju sustreču z Alaksandram Łukašenkam, kali toj pryjedzie na samit.
Taksama pra toje, što Łatvija, jakaja staršyniuje ŭ hetym hodzie ŭ ES, hatova zaprasić Łukašenku na samit, zajaviŭ dziaržsakratar Ministerstva zamiežnych spraŭ Łatvii Andrej Piłdehovič.
«My viedajem, što na papiarednich samitach Alaksandr Łukašenka nie pradstaŭlaŭ Biełaruś na samicie. My hatovyja zaprasić prezidenta Biełarusi», — kazaŭ palityk.
28 krasavika dziaržaŭny sakratar Piłdehovič u Ryzie pieradaŭ kiraŭnikam dypłamatyčnych misij Azierbajdžana, Armienii, Biełarusi, Hruzii, Małdovy i Ukrainy aficyjnyja zaprašeńni na samit.
Aficyjnyja zaprašeńni krainam — udzielnicam UP padpisali staršynia Jeŭrapiejskaha parłamienta Donald Tusk, staršynia Jeŭrapiejskaj kamisii Žan Kłod Junkier i premjer-ministr Łatvii Łajmdota Straujuma.
Ciapier čytajuć
Jak skłaŭsia los vypusknikoŭ, jakimi žurfak hanaryŭsia 10 hadoŭ tamu? Historyja adnaho ŭračystaha kałaža29
Kamientary