U biełaruskaje zakanadaŭstva viartajecca paniaćcie «biazvypłatnaha donarstva»

Z 12 lipienia hetaha hoda zakonnuju siłu nabuduć niekatoryja novaŭviadzieńni, jakija tyčacca donaraŭ.

Alaksandr Łukašenka 8 studzień 2015 hoda padpisaŭ Zakon № 238-Z «Ab uniasieńni dapaŭnieńniaŭ i źmianieńniaŭ u niekatoryja zakony Respubliki Biełaruś pa pytańniach donarstva kryvi i jaje kampanientaŭ». Pastanovaj Savieta ministraŭ 7 maja 2015 hoda № 386 uniesieny źmieny i dapaŭnieńni ŭ pastanovu Savieta ministraŭ Respubliki Biełaruś ad 2 červień 2011 № 693 «Ab niekatorych pytańniach, źviazanych z donarstvam kryvi i jaje kampanientaŭ». Novaje zakanadaŭstva nabyvaje moc 12 lipienia 2015 hoda.

My paprasili namieśnika dyrektara pa transfuzijałohii RNPC transfuzijałohii i miedycynskich bijatechnałohij Taćcianu Klestavu raskazać pra novaŭviadzieńni.

— Paśla raspadu SSSR u Biełarusi donarstva stała płatnym, — tłumačyć Taćciana Viktaraŭna. — Novaj pastanovaj ŭ zakanadaŭstva viartajecca viadomaje z savieckich časoŭ paniaćcie «biazvypłatnaje donarstva», za jakoje hramadzianie nie atrymlivajuć nijakaj hrašovaj kampiensacyi. Tyja, chto zdaje kroŭ na biazvypłatnaj asnovie, u jakaści zaachvočvańnia buduć atrymlivać śniadanak na sumu 29 tysiač (heta 2% biudžetu pražytačnaha minimumu) da danacyi (zdačy) kryvi i 10% biudžetu pražytačnaha minimumu ŭ hrašovym ekvivalencie dla pryjomu ježy paśla hetaj pracedury dla ŭznaŭleńnia siłaŭ. Pry najaŭnaści daviedki ab dzionnym navučańni biazvypłatnym donaram buduć dapłočvać jašče 10% (heta 147 tysiač siońnia).

Kožnamu biazvypłatnamu donaru dajecca 2 vychadnyja dni: dzień danacyi kryvi i druhi pa asabistym žadańni. Akramia taho, atrymać zvańnie Hanarovaha donara taki čałaviek moža paśla 20 danacyj kryvi (u toj čas jak płatny donar — paśla 40) i praz 40 danacyj płazmy (płatnamu donaru ich treba zdać 80). Heta značyć biez škody dla zdaroŭja Hanarovym donaram možna stać praz 5 hadoŭ.

Nahadajem: lhoty dla Hanarovych donaraŭ (niezaležna ad taho, na jakoj asnovie zdavali kroŭ) składajucca z taho, što da asnoŭnaj piensii dapłačvajecca 40% nadbaŭki ad minimalnaj piensii pa ŭzroście, dajecca prava na pazačarhovaje absłuhoŭvańnie ŭ miedustanovie, na mieddapamohu ŭ viedamasnych arhanizacyjach achovy zdaroŭja (u jakich absłuhoŭvalisia da vychadu na piensiju) pazačarhovaje nabyćcio biletaŭ na prajezd, a taksama na adpačynak u zručny dla donara čas.

Meta źmianieńniaŭ i dapaŭnieńniaŭ ŭ zakanadaŭstva — raźvićcio biazvypłatnaha donarstva ŭ našaj krainie, pavyšeńnie biaśpieki kryvi i jaje kampanientaŭ, jakija ŭžyvajucca ŭ kliničnaj praktycy. Čałaviek sam vyrašaje, na jakoj asnovie jon budzie achviaravać kroŭ. Ale ŭ lubym vypadku kroŭ — nie tavar. Kožny z nas pavinien pamiatać: strata kryvi pry donarstvie nie niebiaśpiečnaja dla arhanizma. Siońnia my dajem kroŭ tym, chto ŭ joj maje patrebu. Zaŭtra nas, nie vyklučana, uratuje kroŭ, zdadzienaja nieviadomym suajčyńnikam.

• 0
• 0
• 0
• 0
• 0
• 0
• 0
• 0