Prakuratura Minskaj vobłaści raspačała spravu pa č. 2 art. 154 KK (katavańnie) u dačynieńni da 47-hadovaha žychara Kleckaha rajona, jaki na praciahu 2014—2015 hadoŭ z reŭnaści źbivaŭ svaju žonku.
Jak paviedamiŭ BiełaPAN prakuror adździeła pa nahladzie za daznańniem prakuratury Minskaj vobłaści Maksim Ahiejenka, prakurorskaja pravierka ŭstanaviła, što paśpiachovaść siamji, jakaja demanstravałasia, była tolki bačnaściu. Paciarpiełaja sistematyčna źbivałasia mužam, pry hetym znachodziłasia ŭ materyjalnaj zaležnaści ad jaho, bo nie mieła ŭłasnych srodkaŭ da isnavańnia. Hetuju situacyju jana ŭtojvała i nie žadała «vynosić śmiećcie z chaty».
Ad dapamohi pravaachoŭnych orhanaŭ 42-hadovaja žančyna admaŭlałasia, bo daravała mužu i praciahvała ciarpieć źniavahi i paboi.
Uśviedamlajučy svaju biespakaranaść, raŭnivy muž padčas čarhovaj svarki 6 krasavika hetaha hoda zabiŭ žonku, naniosšy joj nie mienš čym čatyry nažavyja ranieńni ŭ vobłaść hrudziej i šyi.
Kryminalnaja sprava pa fakcie zabojstva rasśledujecca Kleckim rajonnym adździełam Śledčaha kamiteta.
Prakuratura Minskaj vobłaści tłumačyć, što vypadki bytavoha nasilla i žorstkaści nie pavinny zastavacca biespakaranymi, nie treba čakać, kali zdarycca niepapraŭnaja biada. Ab kožnym fakcie pryčynieńnia mužam cialesnych paškodžańniaŭ abo pabojaŭ nieabchodna paviedamlać u milicyju dla pryniaćcia svoječasovych mier, nakiravanych na spynieńnie i prafiłaktyku supraćpraŭnych pavodzin u dačynieńni da členaŭ siamji.
Ciapier čytajuć
Jak skłaŭsia los vypusknikoŭ, jakimi žurfak hanaryŭsia 10 hadoŭ tamu? Historyja adnaho ŭračystaha kałaža29
Kamientary