Vyšejšy sud Sierbii reabilitavaŭ Drahaluba «Draža» Michajłaviča — kiraŭnika manarchistaŭ, jaki padčas Druhoj suśvietnaj vajny paviarnuŭ zbroju suprać kamunistaŭ i staŭ sajuźnikam Sierbskaha dobraachvotnickaha korpusa SS, paviedamili siońnia miascovyja ŚMI.
«Draža» Michajłavič, wikimedia.org
Michajłavič byŭ aficeram u karaleŭskaj juhasłaŭskaj armii i pieršym raspačaŭ partyzanski supraciŭ niamieckaj akupacyi viasnoj 1941 hodu. Juhasłaŭskija kamunisty, jakija znachodzilisia pad kantrolem Maskvy, pačali aktyŭnaje antyniamieckaje zmahańnie tolki paśla pačatku niamiecka-savieckaj vajny.
Pačatkova sierbskija partyzany-manarchisty (t.zv. «četniki»), jakimi kiravaŭ Michajłavič, sprabavali supracoŭničać z kamunistami, adnak ź listapada 1941 hoda pačalisia ŭzbrojenyja sutyknieńni pamiž atradami roznych kirunkaŭ, jakija pieraŭtvarylisia ŭ sapraŭdnuju hramadzianskuju vajnu.
U vyniku četniki pastajanna viali vajnu suprać kamunistaŭ, adnak pry hetym supracoŭničali ź sierbskim uradam hienierała Miłana Niedziča, jaki dziejničaŭ z dazvołu niemcaŭ.
Četniki, jak i charvackija skrajnija nacyjanalisty-ustašy, ličacca vinavatymi ŭ šmatlikich vajennych złačynstvach suprać mirnaha nasielnictva.
U zaležnaści ad situacyi, Michajłavič taksama vioŭ pieramovy i zaklučaŭ zamireńni ź niamieckimi i italjanskimi akupantami.
«Śmierć kamunie» — sierbskija esesaŭcy jeduć na front, wikimedia.org.
U 1944 hodzie, kali kamunistyčny partyzanski ruch rezka ŭzmacniŭsia, a savieckaja armija ŭvajšła na terytoryju Juhasłavii, Michajłavič staŭ sajuźnikam Sierbskaha dobraachvotnickaha korpusa SS (Serbischer SS-Freiwilligen Korps), jaki razam ź niemcami adstupaŭ na poŭnač i zachad krainy.
Sam Michajłavič admoviŭsia pakidać Sierbiju i praciahnuŭ partyzanskaje zmahańnie — ciapier užo tolki suprać kamunistaŭ i savieckich vojsk. U 1946 hodzie jon byŭ zachopleny ŭ pałon i paśla suda rasstralany razam z byłym kamandziram Sierbskaha korpusa SS.
Cikava, ci adreahuje Maskva na reabilitacyju sierbskaha praciŭnika kamunistaŭ, jaki supracoŭničaŭ z nacystami, hetak ža rezka, jak jana reahuje na staŭleńnie ŭkrainskich uładaŭ da Ściapana Bandery i Ramana Šuchieviča?
