Pa adbitkach palcaŭ prahrama biełaruskich navukoŭcaŭ moža vyznačyć typ charaktaru i navat padkazać, jakim sportam i ŭ jakim ampłua zajmacca, pieradaje ANT z Bresta.
Dla vyznačeńnia charaktaru, śćviardžaje aŭtar, dastatkova prykłaści dziesiać palcaŭ da skaniera — praz chvilinu prahrama vydaść vynik. Taki test prapanavali prajści biełaruskim školnikam.
Siarhiej Makarevič, aficyjny pradstaŭnik kampanii «Hienietyk-test», śćviardžaje, što adbitki palcaŭ majuć suviaź ź psichičnymi i fizičnymi charaktarystykami čałavieka, a test daje 80-90% praŭdzivaj infarmacyi. Test nosić rekamiendavalny charaktar, pryznaje raspracoŭščyk, radykalna mianiać svajo žyćcio ad vynikaŭ testu nie abaviazkova.
Na samoj spravie, «Hienietyk-test» u Biełarusi — filijał rasijskaj kampanii, što pryznajecca na aficyjnym sajcie. Mietad zapatentavany ŭ Rasii, ale krytykujecca Kamisijaj pa baraćbie z łženavukaj Rasijskaj akademii navuk.
Na sajcie dajucca šmatlikija spasyłki na repartažy rasijskich ŚMI i šerah znakamitych ludziej, jakija nibyta prajšli testy. Ale spasyłak na navukovyja pracy, apublikavanyja ŭ surjoznych časopisach, niama. Zatoje jość cana: 350 tysiač za test dla adnoha čałavieka.
Pa malunkach na adbitkach palcaŭ nielha vyznačyć nie toje, što charaktar čałavieka, ale navat poł.
Aŭtary testu spasyłajucca na navuku dermatahlifiku, što vyvučaje adbitki palcaŭ, typovyja ŭzory i ich padabienstva. Ale dermatahlifika, u adroźnieńni ad chiramantyi, nie biarecca pradkazvać charaktar ci los čałavieka. Prynamsi, nivodnaha daśledavańnia, jakoje dakazvała by suviaź tempieramientu i adbitkaŭ palcaŭ, u surjoznych navukovych časopisach nie apublikavana.
Pa nakatorych uzorach na adbitkach palcaŭ z peŭnaj stupieńniu dakładnaści (nikoli nie roŭnaj 100%) možna raspaznać hienietyčnyja chvaroby kštałtu sindomu Daŭna ci šyzafrenii. Ale, naprykład, nielha vyznačyć ałkahalizm.
Ale dermatahlifika nie moža vyznačyć navat poł — inačaj kryminalisty mahli by lahčej šukać złačyncaŭ pa adbitkach palcaŭ. Siońnia pa adbitkach palcaŭ možna vyznačyć poł z dakładnaściu ŭ 85%, ale nie pa malunku, a pa rečyvach na pavierchni skury, što zastajucca na adbitkach. Takim ža čynam pa adbitkach palcaŭ prapanujuć raspaznavać narkamanaŭ. Adbitki palcaŭ farmujucca pad uździejańniem u tym liku vypadkovych faktaraŭ, jany roznyja navat u hienietyčna amal identyčnych adnajajkavych bliźniataŭ.
Biełaruski zakon pra rekłamu zabaraniaje rekłamavać pradkazańnie losu z dapamohaj zvyšnaturalnych zdolnaściej. Ale nijaki zakon nie zabaraniaje pravodzić testy biez navukovaha abhruntavańnia vynikaŭ.
Pavieryć u zhadanyja 80-90% supadzieńnia vynikaŭ analizu charaktaru pa adbitkach palcaŭ lohka — ludzi niaredka adznačajuć, što praŭdzivymi akazalisia prahnozy hadałak, astrołahaŭ i chiramantaŭ. Akazańnie imi płatnych pasłuh u Biełarusi nie zabaronienaje (nielha «pradkazvać budučyniu», ale možna prapanoŭvać «psichałahičnyja kansultacyi»), a astrałahičnyja prahnozy prapanujuć u tym liku dziaržaŭnyja vydańni.
