Džym Dynhli: Skarynaŭskaj biblijatekaj u Łondanie na siońnia nie karystajecca nichto, akramia adnaho čałavieka

Brytaniec Džym Dynhli pryjechaŭ u Biełaruś na Mižnarodny kanhres biełarusistaŭ, jaki adbudziecca ŭ Minsku na hetym tydni. U Łondanie sp. Dynhli ŭvachodzić u skład Apiakunskaj rady Skarynaŭskaj biblijateki. Paśla śmierci jaje zasnavalnika, a. Alaksandr Nadsana, ustanova straciła kiraŭnika. Ci nie spynić biblijateka svajo šmathadovaje isnavańnie? Adkazvaje anhlijski biełarusist.

«Naša Niva»: Apošnim časam a. Alaksandr chvareŭ i nie moh zajmacca spravami biblijateki. Chto ciapier joj apiakujecca?

Džym Dynhli: Apiakunskaja rada biare ŭdzieł u jaje pracy. Amal 8 hadoŭ rada nie sustrakałasia. Ale ŭ vieraśni 2013 ja nastajaŭ na takoj sustrečy: ja bačyŭ, što ŭžo nie pad siłu adnamu a. Alaksandru. I z taho času my rehularna sustrakajemsia — apošniaja sustreča adbyłasia 16 maja. I my pryniali rašeńnie adličbavać usiu kalekcyju dakumientaŭ. Pačynajem z časopisaŭ. A paśla prystupim da archivaŭ — heta hramadnaja kalekcyja skrynak z archiŭnymi materyjałami. Nichto nie karystaŭsia hetymi materyjałami, bo nie viedaŭ, što tam. Dla pracy z archivami patrebnaja ekśpiertnaja dapamoha. Ajciec Ihar Łabacevič, jaki ciapier pracuje ŭ Amierycy, takuju dapamohu akazaŭ: jon niadaŭna byŭ u nas i pakinuŭ rekamiendacyi dla dalejšaj pracy. Dakumienty buduć u internecie ŭ svabodnym dostupie.

«NN»: Chto pieraniaŭ kiravańnie biblijatekaj paśla a. Alaksandra?

DD: Nichto piersanalna. Niama čałavieka, jaki moža addać na heta ŭvieś svoj čas. I ciapier my pačynajem pracavać u takim režymie: kožnuju subotu niechta z rady budzie admykać biblijateku.

«NN»: U astatnija dni ŭ jaje trapić možna?

DD: Kali my viedajem, što niechta pryjedzie, možam tam być. Ale nam treba viedać zahadzia.

Ščyra kažučy, nichto nie karystajecca biblijatekaj, akramia Arnolda Makmilina.

Adzin ź siabroŭ rady, Ihar Ivanoŭ, choča, kab biblijateka była adčyniena dla pradstaŭnikoŭ biełaruskaj supolnaści ŭ Łondanie. Kali supolnaść hatovaja padtrymlivać hrašyma… Ale pakul ja hetaha nie baču. Mahčyma, heta i budzie z časam.

«NN»: Pytańnie nie staić, što biblijateka moža spynić svajo isnavańnie?

DD: Nie, takoha pytańnia ŭžo niama. Isnuje Apiakunskaja rada pa anhlijskich zakonach. I nichto nie maje prava začynić biez dazvołu rady, a my takoha dazvołu nie dadzim.

«NN»: I kali nie stanie srodkaŭ na ŭtrymańnie?

DD: Heta inšaje pytańnie. Pakul hrošy jość. Ale samaja hałoŭnaja prablema — hrošy. Ja zrabiŭ kalkulacyju: štohod my płacim 3—4 tysiačy funtaŭ tolki dla taho, kab budynak stajaŭ.

«NN»: Ci pryjazdžajuć siońnia ź Biełarusi daśledčyki ŭ biblijateku?

DD: Było b dobra, kab jany mahli pryjechać. Ale hałoŭnaja prablema — hrošy. My nie možam finansava ich padtrymlivać.

My nie tak šmat i knižak, naprykład, kuplajem, bo ekanomna hladzim na hrošy. Ale kali ludzi hatovyja daryć knižki — kali łaska.

Jakija knižki my pavinny źbirać, jakuju tematyku? Hałoŭnaje — kultura, historyja. Palityka? Mo nie tak važna, bo šmat materyjału ŭ internecie. Mienavita z-za internetu biblijateka siońnia i nie zapatrabavanaja, jak u 1970-1980-ja hady.

***

Dasyłać knihi ŭ Skarynaŭskuju biblijateku ŭ Łondan možna na adras: Francis Skaryna Belarusian Library, 37 Holden Road, London, N12 8HS United Kingdom.

• 0
• 0
• 0
• 0
• 0
• 0
• 0
• 0