Makiej: Minsk i Vašynhton pracujuć nad tym, kab ich pasolstvy adnavili pracu ŭ narmalnym režymie

Minsk i Vašynhton pracujuć nad tym, kab pasolstvy Biełarusi ŭ ZŠA i ZŠA ŭ Biełarusi adnavili pracu ŭ narmalnym režymie. Pra heta paviedamiŭ ministr zamiežnych spraŭ Biełarusi Uładzimir Makiej u intervju haziecie «Vašynhton post». 

Intervju było dadziena 19 maja i 26-ha — apublikavana na sajcie haziety. Siońnia jaho raźmiaściŭ sajt biełaruskaha MZS. 

Na pytańnie, kali ZŠA i Biełaruś znoŭ pryznačać svaich pasłoŭ, Makiej adkazaŭ: «My ničoha nie vyklučajem. Ja nie vydam sakretu, kali skažu, što my raspracavali tak zvany pieralik małych zachadaŭ razam z našymi kalehami ź Dziarždepartamienta. My hety pieralik praktyčna ŭžo paśpiachova realizavali i dumajem nad nastupnym etapam vychadu našych adnosin na novy ŭzrovień. Ja dumaju, što pastupova my padydziem da vyrašeńnia pytańnia paŭnacennaj pracy na ŭzroŭni pasłoŭ u abiedźviuch krainach. Dla hetaha treba krychu pastaracca i adnavić toj uzrovień davieru, jaki pavinien być u adnosinach pamiž dźviuma dziaržavami, jakija chočuć być raŭnapraŭnymi partniorami. My pracujem nad hetym». 

Pry hetym Makiej nie zmoh nazvać kankretnyja terminy. «Viedajecie, u dypłamatyi, i asabliva siońnia, kali situacyja i ŭ našym rehijonie, i ŭ mnohich inšych rehijonach vyhladaje niavyznačanaj, ja nie mahu i nie budu havaryć pra kankretny čas. Ale padziei apošniaha hoda, paŭtara-dvuch hadoŭ havorać ab tym, što my viartajemsia ŭ našych adnosinach da narmalnaj pazityŭnaj dynamiki. I jość peŭnyja prykłady pazityŭnych rašeńniaŭ z dvuch bakoŭ. Tamu my pierakananyja, što rana ci pozna hetaja pazityŭnaja dynamika pryviadzie da paŭnacennaj narmalizacyi adnosin pamiž našymi dziaržavami. Ja b nie staŭ tut ustanaŭlivać niejkija terminy «da jubilejnych dat». Jak pakazvaje historyja, heta zaŭsiody kontrpraduktyŭna», — skazaŭ kiraŭnik MZS. 

Kolkaść supracoŭnikaŭ pasolstva ZŠA ŭ Minsku była skaročanaja pa patrabavańni biełaruskaha boku z 35 čałaviek da piaci ŭ sakaviku 2008 hoda z-za ŭviadzieńnia ZŠA sankcyj u dačynieńni da dziaržkancerna «Biełnaftachim» u suviazi z parušeńniami pravoŭ čałavieka. Nieŭzabavie paśla hetaha pasoł Biełarusi ŭ ZŠA Michaił Chvastoŭ byŭ adklikany z Vašynhtona dla kansultacyj, a Minsk pa patrabavańni biełaruskaha boku pakinuła pasoł Karen Ściuart. U 2014 hodzie biełaruski bok dazvoliŭ pavialičyć štat pasolstva ZŠA ź piaci da šaści čałaviek.

• 0
• 0
• 0
• 0
• 0
• 0
• 0
• 0