U «Neverłendzie». Fota: Jim Bartsch via Wall Street Journal
Ahienctva Sotheby's International Realty vystaviła na prodaž pa canie ŭ 100 młn dalaraŭ ranča Sycamore Valley Ranch ŭ Kalifornii, ZŠA, paviedamlaje The Wall Street Journal. Raniej ranča mieła nazvu «Neverłend» i naležała śpievaku Majkłu Džeksanu.
Siadziba maje 22 pabudovy na płoščy ŭ 11 km², u tym liku 50-miascovy kinateatr, pažarnuju stancyju i čyhunačnuju stancyju, a taksama tenisny kort, sažałki i dva voziera.
Hałoŭny dom płoščaj u 1100 m² maje 6 spalniaŭ, dva doma dla haściej majuć čatyry i dźvie spalni. Adznačajecca, što park atrakcyjonaŭ i zaapark nie pradajucca, ale pakupniku razam ź siadzibaj dastaniecca łama. Słavuty hadzińnik z kvietak zastaŭsia na svaim miescy.
Čyhunačnaja stancyja i kvietkavy hadzińnik u «Neverłendzie» u 2001 hodzie. Fota: Jason Kirk/Getty Images
U 1987 hodzie Džeksan nabyŭ ranča za 19,5 młn dalaraŭ. Jon abstaviŭ ranča jak dziciačy park zabaŭ dy nazvaŭ jaho ŭ honar kazačnaj krainy Pitera Pena. Štomiesiac utrymańnie «Neverłenda» abychodziłasia śpievaku ŭ 120 tysiač dalaraŭ. U 2008 hodzie, za hod da śmierci, jon pradaŭ ranča za 23 młn dalaraŭ, kab kampiensavać zapazyčanaści.
«Neverłend» dvojčy byŭ miescam piedafilskich skandałaŭ: u 1993 i 2003 hodzie Džeksana abvinavačvali ŭ nieprystojnych dziejańniach u dačynieńni da chłopčykaŭ, što haścili ŭ śpievaka. U pieršy raz Džeksan zapłaciŭ siamji 22 młn dalaraŭ (u 2009 hodzie baćka chłopčyka pryznaŭsia, što abvinavačańnie było falšyvym), u druhi raz sud pryznaŭ Džeksana niavinnym praź niedastatkovaść dokazaŭ.
Sudy praź dziaciej u «Neverłendzie» niehatyŭna paŭpłyvali na zdaroŭje śpievaka, jon pačaŭ prymać leki ad stresu. Pryčynaj śmierci Džeksana nazyvajecca pieradaziroŭka mocnaha anastetyka, lekar Džeksana byŭ pryznany vinnym u nienaŭmysnym zabojstvie.
