Maska Haja Foksa časam vykarystoŭvajecca jak simvał ananimnaści ŭ internecie. Vyjava: thissongslaps.com
Na pasiedžańni Rady pa pravach čałavieka AAN mahčymaść ananimnaha vykarystańnia internetu i šyfravańnia asabistych viestak nazvali častkaj bazavych pravoŭ čałavieka, vynikaje sa spravazdačy arhanizacyi.
«Šyfravańnie i ananimnaś dazvalajuć indyvidu vykarystoŭvać svajo prava na svabodu dumki i vyražeńnia ŭ ličbavuju eru i musić staranna achoŭvacca», — zaklučaje dakumient.
U AAN adznačajuć, što ananimnaść u internecie moža vykarystoŭvacca złamyśnikami ŭ tym liku dla arhanizacyi teraktaŭ, ale z tym ža pośpiecham złačynstvy mohuć ździajśniacca z dapamohaj inšych kanałaŭ suviazi. Praz abmiežavanuju kolkaść złačyncaŭ nielha admaŭlać u bazavym pravie ŭsim zvyčajnym ludziam, miarkujuć u arhanizacyi.
Dakumient kaža, što zvyčajnyja ludzi musiać być upeŭnienyja ŭ kanfidencyjnaści pierapiski i viedać, što ich pošta ci paviedamleńni nie buduć prahladacca trecimi asobami. Dakładčyk AAN pa pytańniach svabody słova Devid Kaje ŭ dakładzie prasiŭ urady krain śvietu nie błakavać srodki šyfravańnia i ananimnaści.
Z takimi farmuloŭkami naŭrad ci pahodziacca mnohija ŭrady śvietu. Naprykład, prezident ZŠA Barak Abama kazaŭ ab nieabchodnaści ŭviadzieńnia ŭ prahramy dla pierapiski admysłovy dzir u abaronie («bekdoraŭ») dla śpiecsłužb, a premjer Vialikabrytanii Devid Kemieran abiacaŭ vydać zabaronu na ananimnyja srodki pierapiski, što nie majuć takich dzir.
U Biełarusi srodki ananimnaści ŭ internecie majuć błakavacca zhodna z «antynarkatyčnym dekretam».
Pastanova AAC apisała praceduru błakavańnia zabaronienych sajtaŭ — u «čorny śpis» zanosiacca lubyja srodki dostupu da ich adrazu pa vyjaŭleńni. Tym nie mieniej, na siońnia ŭ Biełarusi nie zabłakavanyja ananimajziery albo ananimnyja sietki nakštałt Tor.
Biełaruskija pradstaŭniki ŚMI i IT-supolnaści vykazvalisia suprać błakavańnia srodkaŭ ananimnaści ŭ internecie dy zhadvali techničnyja składanaści, a toje i niemahčymaść ich poŭnaj błakiroŭki.
