Džuna, calicielnica Brežnieva: zahadka adnosin

«Kolki ž joj było hadoŭ?» — pacikaviłasia znajomaja, kali ja paviedamiŭ joj pra śmierć Džuny. — «66…» — «Oj, a ja dumała, 166!» Voklič prahučaŭ z takoj naturalnaj niepasrednaściu, što vymusiŭ uhledziecca ŭ vočy. Nie, ni cieniu žartu, adnoje ździŭleńnie…

Što praŭda, ja i sam ździviŭsia jašče nie takomu stałamu vieku, u jakim znakamitaja u apošnija 20 hadoŭ XX stahodździa lekarka, pradkazalnica, rodapačynalnica savieckaj ekstrasensoryki i ŭvohule zahadkavaja žančyna sustreła svaju śmierć. Na tle toj minułaj viadomaści paviedamleńnie pra śmierć Džuny Davitašvili vyhladała nadziva ścipła, navat zvyčajna: pajšła ŭ kramu, adčuła siabie drenna, vyjaviłasia, što chvareła na kroŭ…

Miž tym, možna kazać, što syšoŭ u niabyt adzin z samych mistyčnych simvałaŭ kanajučaha SSSR. U peŭnym sensie jaje možna paraŭnać z Raspucinym, pradvieśnikam sacyjalnaj katastrofy — amal takaja ž nabližanaść da ŭładaroŭ dziaržavy i zvyščałaviečyja zdolnaści pa zabieśpiačeńni ich bieśśmiarotnaści. Źniešnie ŭsio heta razychodziłasia z aficyjnymi ideałahičnymi ŭstanoŭkami. Ale čutki pra toje, što Džuna ratuje Brežnieva dy inšych členaŭ i nie členaŭ ad raspadu arhanizmaŭ, nie zabaranialisia. Viała abviarhalisia, ale nie zabaranialisia. Što i vyrašyła adnojčy vykarystać hazieta «Trud», u jakoj ja pracavaŭ ułasnym karespandentam pa BSSR.

Naŭrad ci ja dakładna zhadaju miesiac i navat hod, u jakim Džuna była abiacana ŭ jakaści hałoŭnaj siensacyi na tak zvanym «Vtornikie» «Truda» — admysłovym mierapryjemstvie, što niekalki razoŭ na hod ładziłasia ŭ roznych kutkach tahačasnaj krainy, a kali-nikali i ŭ Maskvie. Dumaju, što heta byŭ krasavik 1984, bo zhadany «vtornik» zvyčajna supadaŭ sa štohadovaj naradaj ułasnych karespandentaŭ, zvyčajna adbyvaŭsia ŭ Kałonnaj zale Doma sajuzaŭ i byŭ vielmi papularnym u maskvičoŭ, bo abiacaŭ nie tolki cikavyja sustrečy, ale i šykoŭny kancert. Pra toje, što siarod inšych znakamitych asob — paetaŭ, artystaŭ, kasmanaŭtaŭ, zaprošana i Džuna, nadavała mierapryjemstvu asablivuju cikavaść.

Ale Džuna pierad hledačami tak i nie źjaviłasia. Pamiataju, što ŭ čakańni jaje adčuvałasia niejkaja napružanaść. Na pytańni, a dzie ž jana, arhanizatary adkazvali niešta nievyraznaje, uzdymali vočy da stoli ci naŭprost admachvalisia — nie da vas…

A ŭ hety čas Džuna začyniłasia ŭ vannaj i rezała sabie vieny. Illa Mielanieŭski, redaktar adzieła navuki, i pamočnik Džuny ŭ zvańni pałkoŭnika dziaržbiaśpieki ŭ adčai ŭvarvalisia ŭ vannuju i ŭhavorvali Džunu supakoicca…

Što ž papiaredničała hetamu ŭsplosku emocyj?

Pra toje, što Džuna zaprošana ŭ Kałonnuju zału, u CK KPSS daviedalisia ad tahačasnaha redaktara Leanida Kraŭčanki, jaki vyrašyŭ, tak by mović, «uzhadnić». I atrymaŭ zahad: «Džunu na scenu nie vypuskać…» Bo vakoł jaje stvaryłasia skandalnaja situacyja: šmat zamiežnych pasolstvaŭ prajavili da Džuny chvaravity intares, ažno kala sta ambasadaraŭ imknucca trapić na hety viečar…

Pa ŭspaminach niepasrednych śviedak Džuna ŭpała ŭ isteryku, kinułasia telefanavać sakrataram CK, staršyni Dziaržpłana Bajbakovu… Ale pilny «pamočnik» paśpieŭ adklučyć telefony.

…Niedzie ŭ archivach, biezumoŭna, chavajucca inšyja padrabiaznaści hetaj historyi. Ale i toje, što viadoma, vyklikaje supiarečlivyja dumki. Z adnaho boku, sumnieŭna, što zamiežnyja pasły cikavilisia Džunaj až tak. Ź inšaha, chtości ź ich napeŭna cikaviŭsia — u spadziavańni pačuć niešta kankretnaje pra stan zdaroŭja jaje «klijentaŭ», što kirujuć jadziernaj krainaj. Z adnaho boku — baraćba z «ciomnaj siłaj», vykryćcio «antynavuki», u rečyščy jakoha abviarhalisia niezvyčajnyja zdolnaści «zvyčajnaj masažystki». Ź inšaha — karystańnie jaje pasłuhami ŭ spadziavańni na doŭhaje žyćcio i bieśśmiarotnaść kamunistyčnaj ułady. Jak by i što ni chavałasia pad pavierchniaj, pałkoŭniki dziaržbiaśpieki «zvyčajnych masažystak» nie achoŭvajuć.

…Tamu «pamočniku» razam ź Mielanieŭskim udałosia adhavaryć Džunu ad samahubstva. Z ruki jašče vyciakała kroŭ, kali jana druhoj rukoj zrabiła na paranienaj ci to masaž, ci to niejkaje inšaje dziejstva. Illa raskazvaŭ, što kroŭ adrazu spyniłasia, źnikli navat parezy.

• 0
• 0
• 0
• 0
• 0
• 0
• 0
• 0