Abama praciahnuŭ na hod sankcyi suprać łukašenkaŭcaŭ
Prezident ZŠA Barak Abama padoŭžyŭ jašče na hod sankcyi ŭ dačynieńni da biełaruskich čynoŭnikaŭ, uviedzienyja ŭ 2006 hodzie jaho papiarednikam Džordžam Bušam. Pasłańnie Abamy Kanhresu ZŠA ab tym, što sankcyi praciahvajucca paśla 16 červienia 2015 h. (kali termin ich dziejańnia pavinien byŭ skončycca), raźmieščana na aficyjnym sajcie Biełaha doma.
U dakumiencie skazana, što dziejańni peŭnych pradstaŭnikoŭ biełaruskaha ŭrada «pradstaŭlajuć nadzvyčajnuju pahrozu nacyjanalnaj biaśpieki i źniešniaj palitycy ZŠA».
Na dumku amierykanskaha prezidenta, hetyja ludzi taksama «padryvajuć demakratyčnyja pracesy i instytuty ŭ Biełarusi». Va ŭkazie, dziejańnie jakoha padoŭžyŭ prezident Abama, ułady Biełarusi abvinavačvajucca ŭ «parušeńniach pravoŭ čałavieka, źviazanych z palityčnymi represijami, u tym liku z zatrymańniami i vykradańniami ludziej, a taksama z karupcyjaj i niepravamiernym vykarystańniem dziaržaŭnaj majomaści i dziaržaŭnaj ułady».
Sankcyi ŭ dačynieńni da Alaksandra Łukašenki i šerahu čynoŭnikaŭ i členaŭ ich siemjaŭ, byli ŭviedzienyja 16 červienia 2006 h Džordžam Bušam. Nahodaj stali prezidenckija vybary ŭ Biełarusi, jakija ŭ ZŠA i ES pryznali niedemakratyčnymi.
Sankcyi praduhledžvajuć błakavańnie rachunkaŭ nazvanych asob u amierykanskich bankach, zabarona im na ŭjezd u ZŠA, zabarona amierykanskim kampanijam mieć ź imi spravy.
U 2010 hodzie, paśla čarhovych prezidenckich vybaraŭ, śpis biełaruskich čynoŭnikaŭ, jakim zabaronieny ŭjezd u ZŠA, byŭ pašyrany. U čornym śpisie znachodziacca Alaksandr i Viktar Łukašenka, staršynia CVK Lidzija Jarmošyna, kiraŭnik spraŭ prezidenta Viktar Šejman, były namieśnik kiraŭnika Administracyi prezidenta Natalla Piatkievič i inšyja.
Poŭny śpis biełaruskich čynoŭnikaŭ, što trapili pad sankcyi u ZŠA, nie raskryvajuć pa zakonie.
30 kastryčnika 2014 hoda i Jeŭrasajuz praciahnuŭ sankcyi suprać aficyjnaha Minska. Pry hetym z čornaha śpisu byli vyklučanyja 24 čałavieki i siem biełaruskich kampanij, bo, jak paviedamili ŭ ES, «źnikli padstavy» dla znachodžańnia ich u hetym śpisie. Pad sankcyjami zastaŭsia 201 hramadzianin Biełarusi i 18 jurydyčnych asob.
Kamientary