Siońnia ranicaj byŭ abmiežavany dostup da sajta kyky.org. Paviedamleńnie ab hetym raźmieščana na aficyjnym sajcie ministerstva.
U paviedamleńni Ministerstva infarmacyi zaznačałasia: «U adpaviednaści z Zakonam Respubliki Biełaruś ad 17 lipienia 2008 hoda «Ab srodkach masavaj infarmacyi» 15 červienia 2015 h. Ministerstva infarmacyi Biełarusi pryniało rašeńnie ab abmiežavańni dostupu da infarmacyjnaha resursu kyky.org z pryčyny raźmiaščeńnia infarmacyi, raspaŭsiudžvańnie jakoj zdolna nanieści škodu nacyjanalnym intaresam Respubliki Biełaruś (padpunkta 1.3 punkta 1 artykuła 38 Zakona ab ŚMI)», — havorycca ŭ paviedamleńni.
U šerahu publikacyj, raźmieščanych na hetym infarmacyjnym resursie, paviedamlajecca na sajcie viedamstva, utrymlivajucca prynižalnyja vykazvańni ŭ dačynieńni da dziaržaŭnaha śviata Respubliki Biełaruś — Dnia Pieramohi, hramadzian krainy, jakija ŭ im ŭdzielničajuć, asprečvajecca značnaść hetaj padziei ŭ historyi krainy, tym samym skažajecca histaryčnaja praŭda ab Vialikaj Ajčynnaj vajnie. Taksama ŭ materyjałach na sajcie kyky.org prysutničaje tabujavanaja leksika, hreblivyja, a časam i abraźlivyja vykazvańni na adras pradstaŭnikoŭ peŭnych sacyjalnych hrup, nacyjanalnaściaŭ i relihijnych kanfiesij.
Prava błakavać internet-sajty Ministerstva infarmacyi Biełarusi atrymała 1 studzienia hetaha hoda paśla ŭstupleńnia ŭ siłu papravak u Zakon «Ab ŚMI», paśpiešliva pryniatych naprykancy 2014 hoda.
Paśla 10-j hadziny ranicy sajt kyky.org pierastaŭ adkryvacca jak ź Biełarusi, tak i z-za miažy, a taksama praz srodki ananimnaści. Kala 12:30 sajt staŭ dasiažny praz ananimajziery i Tor. Paśla 13:00 dostup da sajta byŭ adnoŭleny, ale zatym znoŭ spyniŭsia.
Jak raspavioŭ «Našaj Nivie» redaktar Kyky.org Pavieł Śviardłoŭ, sajt chościŭsia nie ŭ Biełarusi, tamu takaja «hłabalnaja» niedasiažnaść vyhladała dziŭna.
«Sajt pakul nie zabłakavany. Jon loh, i my z hetym sprabujem zmahacca», — napisała na Facebook dyrektar Kyky.org Darja Maciavina.
Pakul nieviadoma, ci była heta ŭnutranaja pamyłka, ci na sajt paralelna z błakiroŭkaj viadziecca chakierskaja ataka.
«Źviazalisia ź Mininfarmam. Nam dasłali list z paznačeńniem kankretnych parušeńniaŭ, — piša Kyky ŭ tvitary. — Vypravim — možna padavać zajaŭku na adnaŭleńnie dostupu».
Čytajcie taksama:
KYKY.ORG zabłakavali «pa prośbie» emihranta Viačasłava Dzijanava
Ciapier čytajuć
Pra Miełkaziorava ŭ jaho apošni dzień: «Było adčuvańnie, što jon stomleny, brakuje enierhii, rysy tvaru byli zapałyja»1
Kamientary