Zajava ministra pracy i sacyjalnaj abarony Maryjany Ščotkinaj aburyła hramadskaść. Nahadajem, naviedvajučy hrodzienskuju abutkovuju fabryku «Nioman», čynoŭnica paraiła biełarusam šukać padpracoŭki. «My pahladzieli, što amal 93% biełarusaŭ pracujuć tolki na adnoj pracy, a heta i mužčyny. Ale kali mama zajmajecca doma dziećmi, dyk chaj tata «pakrucicca», — zajaviła Ščotkina.
U internecie tysiačy ludziej u kamientach stavili toje samaje pytańnie: jakuju druhuju rabotu znajšła sama Maryjana Ščotkina?
Pavodle zakona «Ab dziaržaŭnaj słužbie», čynoŭniki nie mohuć vykonvać pracu na ŭmovach sumiaščalnictva i zajmacca pradprymalnickaj dziejnaściu. Adnak i biez hetaha Ščotkina zmahła zabiaśpiečyć svoj dabrabyt.
Naradženka Murmanskaj vobłaści ź dziasiatak hadoŭ tamu pabudavała vialikuju trochpakajoŭku (bolš za 90 m2) u spalnym rajonie Minska, a ciapier atrymała nadzieł u elitnaj Viaśnincy. «Naša Niva» naviedała «Drazdy-2», dzie dabudoŭvajecca katedž čynoŭnicy.
Na žal, rabočych na abjekcie nie było. Ich kalehi z susiednich budoŭlaŭ patłumačyli, što apošni tydzień u Ščotkinaj pracavali tynkoŭščyki, ale jakraz učora skončyli pracu.
Asabniak ministra voś užo druhi hod uzvodzicca na vačach susiedki z chaty nasuprać. Padčas raźmierkavańnia nadziełaŭ u Viaśnincy było vyrašana pakinuć niekalki starych damoŭ. Znosić ich i vypłačvać kampiensacyju było zadoraha dla dziaržavy.
«U mianie tut byŭ sad — i ałyča, i parečki, i rabina… U baćkoŭ było kaliści 30 sotak! A paśla pryjšli i abrezali ziamlu da 3 sotak. Pryhnali buldozier, i ŭsio…» — raskazvaje susiedka Ščotkinaj.
Zahłušajučy razmovu, z susiedniaha doma niaspynna ravie pierfaratar, budaŭničyja mašyny tym časam uzdymajuć pył da niabiosaŭ. Viasnoj jašče horš — darohi niama, brud pa kalena. Tamu davodzicca iści da prypynku ŭ humovych botach.
«My paŭsiul i pisali, i haračuju liniju vyklikali… Płakali, haravali, ale nichto ž nie źviartaje ŭvahu, budoŭla idzie, — narakaje žančyna. — My z mužam insult atrymali. Pasprabuj takoje žyćcio — jak prakładvali kanalizacyju, jak katalisia husieničnyja traktary… Usio hajdajecca, nievynosna!»
Staražyły Viaśninki vystaŭlali svaje ŭčastki na prodaž. Kamu ŭdałosia znajści kupca, atrymlivali vialikija hrošy, da $600 tysiač.
«Tut usie našyja tružaniki, jany ž na dźviuch-troch rabot ukałvajuć… — abvodzić jana rukoj budoŭli čynoŭnikaŭ. — Ja i na piensii, i pracuju, ale ŭsio adno, što prychodzić, to i sychodzić. Ničoha padobnaha nie pabuduješ, navat rekanstrukcyju doma nie zrobiš».
* * *
Maryjana Ščotkina
Naradziłasia 20 listapada 1958 na vostravie Kildyn Murmanskaj vobłaści Rasii.
Skončyła Leninhradski dziaržaŭny ŭniviersitet imia A. A. Ždanava pa śpiecyjalnaści «fizika» (1982), Akademiju kiravańnia (2007).
U 1982—1986 pracavała inžynieram VA «Intehrał», inžynieram filijała Akustyčnaha instytuta imia M. Andrejeva ŭ Sievieramorsku.
U 1986 pierajechała ŭ Minsk. Zrabiła karjeru ŭ adukacyi - nastaŭnica fiziki, namieśnica dyrektara škoły, dyrektarka škoły, načalnica ŭpraŭleńnia adukacyi administracyi Frunzienskaha rajona Minska.
U 2003—2005 — namieśnica kiraŭnika administracyi Leninskaha rajona Minska, u 2005—2007 — staršynia kamiteta pa pracy, zaniataści i sacyjalnaj abaronie Minharvykankama.
Z 2007 hoda namieśnica, pieršaja namieśnica ministra pracy i sacyjalnaj abarony.
Z 2009 — ministr pracy i sacyjalnaj abarony.
Zamužam, maje syna.
