U Biełarusi śviata šanujuć i zaŭsiody buduć pomnić achviar Vialikaj Ajčynnaj vajny. Ab hetym zajaviŭ Alaksandr Łukašenka 22 červienia na mitynhu-rekvijemie «Brama pamiaci», pryśviečanym adkryćciu miemaryjalnaha kompleksu «Traścianiec».
«22 červienia 1941 hoda - trahičnaja data dla našaha naroda, - padkreśliŭ kiraŭnik dziaržavy. - Pačatak Vialikaj Ajčynnaj vajny my adznačajem jak Dzień usienarodnaj pamiaci i smutku. Siońnia my sabralisia na adkryćcio hetaha vieličnaha manumienta, uźviedzienaha ŭ pamiać ab ludziach, jakija pryniali pakutnickuju śmierć ad ruk fašysckich kataŭ».
Łukašenka nahadaŭ, što mienavita tut, u navakolli biełaruskaj viosački Mały Traścianiec, dziejničaŭ samy bujny na akupiravanaj terytoryi Savieckaha Sajuza kancentracyjny łahier. Tut abarvałasia žyćcio bolš jak 200 tys. čałaviek. Siarod ich byli nie tolki vajennapałonnyja, partyzany, ale i mirnyja žychary - staryja, žančyny, dzieci.
«Serca ściskajecca ad bolu, kali ŭjaŭlaješ razmach źvierstvaŭ i złačynstvaŭ nacystaŭ suprać čałaviečnaści, - skazaŭ Alaksandr Łukašenka. - Cełymi ešałonami siudy zvozili ludziej roznych nacyjanalnaściej i vieravyznańniaŭ. Nie tolki našych suajčyńnikaŭ, ale i žycharoŭ inšych jeŭrapiejskich dziaržaŭ - Polščy, Hiermanii, Aŭstryi, Čechasłavakii. Pracavaŭ strašny kanviejer śmierci. Va ŭročyščy Błahaŭščyna adbyvalisia masavyja rasstreły, va ŭročyščy Šaškoŭka ažyćciaŭlałasia spaleńnie cieł».
Vosieńniu 1943 hoda, pradčuvajučy zychod vajny, fašysty pačali źniščać ślady svaich złačynstvaŭ. Jany vykopvali astanki zahinułych i spalvali ich na draŭlanych stełažach. Tolki za try dni da vyzvaleńnia Minska tut byli rasstralany, a potym spaleny 6,5 tys. viaźniaŭ.
«Ziamla, na jakoj my staim, ščodra palita ślazami i kroŭju socień tysiač nievinavatych ludziej. U joj da hetaha času znachodzicca ich prach», - padkreśliŭ kiraŭnik Biełarusi.
Jon prapanavaŭ ušanavać pamiać usich achviar, jakija pryniali pakutnickuju śmierć na hetaj ziamli, minutaj maŭčańnia.
«Jość rany, jakija nie lečyć čas. Nieźličonyja achviary Vialikaj Ajčynnaj vajny - adna z takich niezahojnych ran, - ličyć Alaksandr Łukašenka. - Hady fašysckaj akupacyi pakinuli hłyboki śled na našaj ziamli. Spalenyja vioski i razburanyja harady, biesčałaviečnyja «fabryki śmierci» - usio heta było nacelena na źniščeńnie našaha naroda. Ad Biełarusi praktyčna nie zastałosia i śledu. Nielha zabyvać, što na terytoryi krainy było amal 250 łahieraŭ savieckich vajennapałonnych, 350 miesc źniavoleńnia hramadzianskaha nasielnictva, 186 jaŭrejskich hieta».
Kiraŭnik dziaržavy taksama adznačyŭ: «My śviata šanujem i budziem pomnić achviar toj vajny. Tamu ŭźviadzieńnie miemaryjała ŭ Traściancy źjaŭlajecca dla biełarusaŭ spravaj honaru».
Ciapier čytajuć
Raptoŭna pamior Uładzimir Usier — niemałady aktyvist, jaki ŭlapaŭsia ŭ film BT i špijanaž u Polščy2
Kamientary