Chto idzie na prezidenta?
Siońnia pałata pradstaŭnikoŭ Nacyjanalnaha schodu Biełarusi pryniała rašeńnie pryznačyć prezidenckija vybary na 11 kastryčnika. «Naša Niva» pacikaviłasia ŭ patencyjnych kandydataŭ na vysokuju pasadu pra ich udzieł u kampanii.
«Paćviardžaju», — reziumavała Taćciana Karatkievič, aktyvistka kampanii «Havary praŭdu».
Namieśnik staršyni TBM Alena Anisim kančatkova zajavić pra svajo rašeńnie ŭviečary: «Usio siońnia na pres-kanfierencyi».
Staršynia Biełaruskaj partyi levych «Spraviadlivy śviet» Siarhiej Kalakin paćvierdziŭ, što budzie ŭdzielničać u prezidenckaj kampanii.
«Tak, u nas idzie zbor inicyjatyŭnaj hrupy. Rašeńnie źjezda było pryniata, tamu ŭsio idzie pa płanie. Prosta siońnia my daviedalisia, što i kali my pavinny rabić. Zbor podpisaŭ pačniecca 23 lipienia. A da 17.07 nam treba zdać inicyjatyŭnuju hrupu. Siurpryzaŭ ad siońniašniaha rašeńnia my nie čakali i nie atrymali». Kalakin užo viedaje, chto ŭznačalić jaho inicyjatyŭnuju hrupu, ale nazavie asobu paźniej. «Ja nazavu jaho 12-ha. Heta budzie kiraŭnik štaba. Ja viedaju jaho, ale jon jašče nie zaćvierdžany».
A voś kiraŭnik hramadskaj kampanii «Naš dom» Volha Karač kančatkova admoviłasia ad svajho ŭdziełu ŭ jakaści kandydata ŭ hetaj kampanii.
«Tak atrymałasia, što dakładna nie budu».
Vierahodnaść jaje ŭdziełu zastavałasia da apošniaha. «Tak, jana była i zastavałasia. Ale pytańnie jašče ŭ tym, što ŭ mianie praz dva miesiacy terminovaja apieracyja, i ja budu niejki čas na mylicach. Nielha hetaj apieracyi paźbiehnuć. A rabić prezidenckuju kampaniju ŭ invalidnym vazku — kreatyŭna moža być, ale, miarkuju, što ciažkavata».
Staršynia Abjadnanaj hramadzianskaj partyi Anatol Labiedźka paćvierdziŭ svoj udzieł u prezidenckaj kampanii, ale z ahavorkaj. «Davajcie z terminałohijaj: dla vas, moža, data vybaraŭ, a dla nas — palityčnaj kampanii. My majem rašeńnie, jakoje było pryniata bolš za hod tamu ab udziele ŭ palityčnaj kampanii, jakaja nazyvajecca «prezidenckija vybary». My budziem dziejničać pa svaim scenaryi, a nie pa terminałohii i scenaryi spadaryni Jarmošynaj».
Lidar Libieralna-demakratyčnaj partyi Siarhiej Hajdukievič raśśmiajaŭsia na pačutaje pytańnie: «Vy nie pamylilisia telefonam? U žančyn, zabyŭsia ich proźviščy, jašče možna pytacca, a što ŭ mianie. Jak ja mahu nie ŭdzielničać, kali ŭžo dva hady rychtujusia da prezidenckaj kampanii? U nas ža daŭno ŭsio jość — i štaby stvorany. Jak možna paćvierdzić vidavočnaje?»
Kiraŭnikom štaba budzie Anatol Chiščanka (namieśnik Hajdukieviča pa partyi), kaardynavać pracu štaba budzie Aleh Hajdukievič (pieršy namieśnik staršyni ŁDP).
Juryj Šulhan taksama nie źbirajecca admaŭlacca ad udziełu ŭ prezidenckaj honcy. «Nie bačym padstaŭ, pa jakich jon nie budzie ŭdzielničać. My raźličvali, što daty buduć pieraniesienyja ŭ bok leta z metaj, kab usia aktyŭnaja častka prajšła padčas letnich adpačynkaŭ. I heta abciažarvaje pracu ŭsim niezaležnym kandydatam. Ale my byli da hetaha hatovyja, tamu nijakich źmien u stratehii ŭ nas niama», — zajaviŭ Pavieł Kanavalčyk, kiraŭnik štaba Šulhana.
«My vielmi hetaha chočam, my nastojvajem» — pres-sakratarka Łukašenki raskazała, ci pojdzie toj na nastupnyja vybary3
Kamientary