Miaśnikovič: Z zakupaŭ biełarusaŭ u zamiežnych interniet-kramach treba brać padatak

Z pasyłak, jakija prychodziać biełarusam z-za miažy, treba spahaniać PDK, pierakanany staršynia savieta respubliki Michaił Miaśnikovič. Na jaho dumku, taksama treba ŭparadkavać schiemu acenki banderolaŭ z zamiežnych internet-mahazinaŭ.

«Mižnarodnyja paštovyja adpraŭleńni łavinapadobna rastuć, adnak faktyčna nie dajuć «Biełpošcie» niejkich istotnych dachodaŭ. U minułym hodzie ŭ Biełaruś pryjšło 6,5 miljona pasyłak, jakija źmiaščajuć tavarnyja ŭkładańni. I heta ŭsio pierapracoŭvajecca poštaj. Za piać miesiacaŭ hetaha hoda pastupiła ŭžo amal 5 miljonaŭ pasyłak, — zajaviŭ Michaił Miaśnikovič. — Pryčym hetyja pasyłki prychodziać z zamiežža nie tolki dla asabistaha karystańnia fizičnaj asoby, ale tam utrymlivajucca cełyja partyi tavaraŭ, jakija potym realizujucca, h.zn. pradajucca na rynkach, u inšych miescach».

«Pieraličvajučy hrošy pa hetych pasyłkach, naprykład, u Kitaj, pakupnik nie płacić padatak na dabaŭlenuju vartaść. Kali my z vami idziem u kramu, kuplajem chleb, małako, to aŭtamatam płacim PDV. Ale, kuplajučy reč za miažoj, PDV nie vypłačvajecca», — miarkuje Michaił Miaśnikovič.

Pavodle jaho słoŭ, sumnievy taksama vyklikaje toje, jak biełarusy aceńvajuć košt pasyłak. Niaredka atrymalniki banderolaŭ z-za miažy ŭkazvajuć toj ceńnik, jaki dazvolić im «trapić u dazvolnuju sistemu».

«Dumaju, heta pytańnie my vyrašym», — reziumavaŭ staršynia savieta respubliki.

Pra toje, što pakupki biełarusaŭ u zamiežnych internet-kramach płanujecca ŭparadkavać, jašče ŭ sakaviku zajaviŭ ministr handlu Valancin Čakanaŭ. Ministr padkreśliŭ, što biełarusy pa-raniejšamu buduć mieć mahčymaść rabić pakupki ŭ zamiežnych internet-kramach.

«Hety kanał budzie pracavać i dalej, ale tut treba prymać niekatoryja narmatyŭnyja pravavyja akty, kab hety handal byŭ uparadkavany, — skazaŭ Valancin Čakanaŭ. — My pa hetym šlachu idziem, i ŭžo niekatoryja pytańni ŭ hetym kirunku vyrašyli».

Z 25 kastryčnika 2014 h. prezidenckim ukazam № 60 byŭ pavialičany maksimalny košt pasyłak, jakija biełarusy zmohuć atrymlivać biez vypłaty mytaŭ: u paštovych adpraŭleńniach sa 120 da 200 jeŭra, pry dastaŭcy pieravozčykam — z 10 da 200 jeŭra. U DMK źviartajuć uvahu, što kolkaść adpraŭleńniaŭ, jakija dazvolena atrymać z-za miažy, nie abmiežavana: hałoŭnaje ŭpisacca va ŭstanoŭlenyja zakonam limity.

Pavodle statystyki, 81% biełarusaŭ robić pakupki ŭ ajčynnych internet-kramach. Ale ŭ apošni čas našy hramadzianie ŭsio čaściej zakazvajuć tavary poštaj na zamiežnych handlovych placoŭkach. U hetym śpisie lidziruje Kitaj z dolaj u 33%. Na druhim miescy — krainy ES, na trecim — rasijskija kramy.

• 0
• 0
• 0
• 0
• 0