U Biełarusi ŭ 2016-2020 hadach prapanujecca realizavać 24 dziaržaŭnyja prahramy. Ab hetym paviedamiŭ siońnia ministr ekanomiki Uładzimir Zinoŭski ŭ čas pasiadžeńnia prezidyuma Savieta Ministraŭ, pradstaŭlajučy prajekt asnoŭnych pałažeńniaŭ prahramy sacyjalna-ekanamičnaha raźvićcia Biełarusi na budučuju piacihodku.
«Na piacihodku prapanujecca 24 dziaržaŭnyja prahramy zamiest 101, — adznačyŭ ministr. — Pry hetym 2/3 usich biudžetnych srodkaŭ, vydzielenych na prahramnyja mety sacyjalna-ekanamičnaha raźvićcia, idzie na raźvićcio čałaviečaha patencyjału». Takim čynam, sacyjalnaja nakiravanaść ekanamičnaj palityki na 2016-2020 hady zachoŭvajecca.
Pavodle słoŭ Uładzimira Zinoŭskaha, pieralik dziaržprahram užo adpracavany z zacikaŭlenymi i ŭ cełym uzhodnieny. Zastałosia adno pytańnie — pa prahramie demahrafičnaj biaśpieki, jakaja značna pierasiakajecca pa mierapryjemstvach z prahramaj zdaroŭja naroda, adznačyŭ kiraŭnik Minekanomiki. U suviazi z hetym prapanujecca sfarmiravać adnu dziaržaŭnuju prahramu — «Zdaroŭje naroda i demahrafičnaja biaśpieka Biełarusi» na 2016-2020 hady.
«Što ž datyčycca dalejšaj adpracoŭki, rabočaja hrupa prosić pryniać prajekt pieraliku dziaržprahram za asnovu, daručyć zakazčykam, kaardynataram z ulikam asnoŭnych pałažeńniaŭ piacihodki ŭzhadnić kančatkovyja najmieńni dziaržprahram, pačać farmiravańnie prajektaŭ kancepcyj dziaržprahram, jakija detalizujuć rabotu pa pryjarytetach piacihodki, uzhadniajučy z kalehami mižhalinovyja pytańni», — pradoŭžyŭ ministr.
Na hetu rabotu prapanavana advieści 2 miesiacy.
Jak adznačyŭ u chodzie pasiadžeńnia premjer-ministr Andrej Kabiakoŭ, farmiravańnie dziaržaŭnych prahram zhodna z prajektam prahramy sacyjalna-ekanamičnaha raźvićcia ažyćciaŭlałasia na novych pryncypach — usie jany, jak ahučvałasia raniej, pavinny raspracoŭvacca ŭ raźvićcio pryjarytetaŭ, vyznačanych na budučuju piacihodku. «Faktyčna prapanujecca pierachod na prahramna-metavy mietad biudžetnaha płanavańnia, aryjentavanaha na vynik», — rastłumačyŭ kiraŭnik urada.
