Hrečaski premjer Aleksis Cypras vystupiŭ z telezvarotam da hramadzian. Jon zajaviŭ, što refierendum, pryznačany na niadzielu, adbudziecca, a taksama zaklikaŭ hrekaŭ hałasavać suprać mier, prapanavanych jeŭrapiejskim bokam.
Svaju pazicyju Cypras matyvavaŭ tym, što admova pryniać dziejučuju prapanovu jeŭrazony dapamoža Hrecyi vybić lepšyja ŭmovy na dalejšych pieramovach. U jakaści prykładu Cypras pryvioŭ situacyju z admovaj Irłandyi ratyfikavać Lisabonskaje pahadnieńnie, jakaja dazvoliła Irłandyi damahčysia lepšych umoŭ.
Premjer taksama dadaŭ, što tyja, chto kaža pra niepaźbiežny vychad Hrecyi ź jeŭrazony ŭ vypadku admovy ad biahučaj prapanovy kredytoraŭ, chłusiać. «Refierendum u niadzielu nie stavić pad sumnieŭ siabroŭstva krainy ŭ jeŭrazonie. Jano samo saboj zrazumieła i nichto nie moža jaho asprečyć», — skazaŭ Cypras.
Jon taksama zapeŭniŭ hramadzian u tym, što zarobki i piensii pa-raniejšamu buduć vypłačvacca.
Asnoŭnyja tezisy svajho telezvarotu Cypras paŭtaryŭ u svaim tvitary.
«Paśla taho jak byŭ abvieščany refierendum, nam pastupili bolš vyhadnyja prapanovy — asabliva ŭ častcy restrukturyzacyi doŭhu. U paniadziełak urad Hrecyi zmoža sieści za stoł pieramovaŭ, zaručyŭšysia vynikami refierendumu, damahajučysia lepšych umoŭ dla hrečaskich hramadzian. Mierkavańnie bolšaści značna važniej voli ŭrada. (Jeŭropa) vas šantažuje i zaklikaje hałasavać u padtrymku mier, jakija nie majuć na ŭvazie vychadu z kryzisu. «Nie» — heta nie prosta słohan. «Nie» - heta rašučy krok na šlachu da lepšych umoŭ. «Nie» nie aznačaje razryvu adnosin ź Jeŭropaj, heta viartańnie da jeŭrapiejskich kaštoŭnaściaŭ», — havorycca ŭ niekalkich paviedamleńniach hrečaskaha premjera ŭ sacsietcy.