Łukašenka zvolniŭ čatyroch minskich sudździaŭ za tajamničuju pravinu
Na Nacyjanalnym pravavym partale Respubliki Biełaruś apublikavany Ukaz prezidenta ad 2 lipienia 2015 hoda №299 «Ab pryznačeńni i vyzvaleńni sudździaŭ». Zdavałasia b, ničoha asablivaha, kali b nie vyzvaleńnie ad pasad adrazu čatyroch vysokapastaŭlenych sudździaŭ Ekanamičnaha (byłoha haspadarčaha) suda h. Minska ŭ suviazi z učynieńniem imi niejkaj praviny.
Svaich pasadaŭ pazbavilisia były staršynia ekanamičnaha suda Minska Ihar Ždanovič, jaho namieśnik Siarhiej Kułakoŭski, sudździ Aleh Klujko i Andrej Rybałkin.
Paviedamlajecca, što heta adbyłosia «ŭ suviazi z učynieńniem praviny, niesumiaščalnaj sa znachodžańniem na dziaržaŭnaj słužbie (artykuł 124 Kodeksa Respubliki Biełaruś ab sudaŭładkavańni i statusie sudździaŭ)».
Ždanovič prasiadzieŭ na svajoj pasadzie nie tak doŭha – jon byŭ pryznačany staršynioj ŭ studzieni 2014. Źjaŭlaŭsia staršynioj haspadarčaha suda Minska z momantu stvareńnia suda, z 1 studzienia 1999 hoda.
Da hetaha pracavaŭ u orhanach prakuratury Respubliki Biełaruś, narodnym sudździoj, staršynioj suda Centralnaha rajona Minska, namieśnikam staršyni Najvyšejšaha haspadarčaha suda Respubliki Biełaruś. Jamu prysvojeny pieršy kvalifikacyjny kłas.
Jaho namieśnik Siarhiej Kułakoŭski — rodam z Hrodna. Pasadu namieśnika jon zajmaŭ z 13 vieraśnia 2010. Da hetaha pracavaŭ sudździoj Haspadarčaha suda Hrodzienskaj vobłaści, sudździoj Najvyšejšaha haspadarčaha suda Respubliki Biełaruś. Jamu taksama prysvojeny pieršy kvalifikacyjny kłas.
Čutki ab majučym adbycca zvalnieńni nazvanych sudździaŭ chadzili ŭ jurydyčnych kołach davoli praciahły čas, z momantu zatrymańnia supracoŭnikami KDB Biełarusi sudździ hetaha ž suda Juryja Hrušeckaha. Jamu inkryminujecca atrymańnie chabaru (č.3 art.430 - atrymańnie chabaru asobaj, jakaja zajmaje adkaznaje stanovišča). Sankcyi pa hetym artykule praduhledžvajuć pazbaŭleńnie voli na termin ad 5 da 15 hadoŭ z kanfiskacyjaj majomaści. Hrušeckaha zatrymali jašče ŭ lutym hetaha hoda.
Kamientary