Z 1 lipienia Jury Rubcoŭ haładuje na znak pratestu suprać abychodžańnia ź im i ŭmovaŭ utrymańnia ŭ Baranavickim śledčym izalatary. Pra heta paviedamiła žonka Rubcova Jadviha.
«Siońnia muža naviedała advakat i voś tolki niadaŭna mnie adzvaniłasia. Akazvajecca, z 1 lipienia jon znoŭ haładuje. Pratestuje suprać umovaŭ u izalatary i taho, jak ź im tam abychodziacca. Pačuvajecca i vyhladaje nibyta jašče narmalna, ale heta, vidać, tolki tamu, što haładoŭka doŭžycca ŭsiaho 9 dzion. Dla mianie heta vielmi balučaja navina. Da jahonaj haładoŭki ŭ izalatary staviacca pakul strymana, ale ŭžo pahražajuć, što pakarajuć karceram, kali budzie dalej praciahvać», — skazała Jadviha Rubcova.
Advakat palitviaźnia paviedamiła pra pryčyny, jakija vyklikali pratest.
«Jak kazaŭ Rubcoŭ, doŭhi čas tut byli pierapynki z prahułkami, jamu daviałosia navat skardzicca. Taksama jon skardziŭsia na toje, što jaho abmiežavali ŭ nabyćci praduktaŭ u turemnaj kramie. Jašče jamu ŭžo niekalki razoŭ, jak jon kaža, davodzili, što ŭ jaho jość niejkija parušeńni, choć aficyjnych pretenzijaŭ nie vystaŭlali, adnak pahražali źmiaścić u ŠYZA. Ale hałoŭnaje, što jaho «začapiła» — heta što davodzicca padymacca, kali ŭ kameru ŭvachodzić chto z achoŭnikaŭ. Kaža, što «vymušany siadzieć u kamery, jakaja jak prybiralnia, dyk jašče i kłaniacca kožnamu praparščyku». Miž tym jon nia ličyć siabie ni ŭ čym vinavatym. Voś heta ŭsio dla jaho syšłosia, i ŭ vyniku jon abviaściŭ haładoŭku. Pryčym aficyjna pra haładoŭku ničoha tut nia kažuć. U vyniku my razam ź im sieli, skłali skarhu na dziejańni achoŭnikaŭ dy nakiravali na imia načalnika ŭstanovy, kab razabralisia ŭ pryčynach jahonaha pratestu. Ale taksama ja paprasiła jaho, kab jon byŭ bolš strymany, bolš dumaŭ i pra svajo zdaroŭje, jakoje ŭžo nie najlepšaje paśla minułaj haładoŭki. Spadziajusia, heta padziejničaje. Ale pakul jon haładoŭku praciahvaje», — paviedamiła advakat.
Pavodle advakata, na 24 lipienia pryznačany razhlad kasacyjnaj skarhi Juryja Rubcova na prysud Pružanskaha rajonnaha sudu, jaki pakaraŭ byłoha «chimika» Rubcova za admovu pracavać dvuma hadami źniavoleńnia. Skarhu Rubcova razhledzić Bieraściejski abłasny sud.
Jury Rubcoŭ nie pryznaje viny i kaža, što nie admaŭlaŭsia pracavać na «chimii» zusim, a tolki patrabavaŭ, kab jamu dali pracu z zarobkam, adpaviednym siaredniamu pa Biełarusi. Da pracesu ŭ Pružanskim rajonnym sudzie Jury Rubcoŭ trymaŭ haładoŭku, patrabujučy adkrytaha pracesu i spynieńnia pieraśledu. Tady palitviazień haładavaŭ kala 50 dzion i schudnieŭ bolš jak na 20 kilahramaŭ. Z Baranavickaha śledčaha izalatara, dzie Rubcova trymajuć paśla sudu, jon skardziŭsia na drennaje charčavańnie.
U 2014 hodzie Jury Rubcoŭ byŭ asudžany na 1,5 hoda «chimii» za źniavahu sudździ Savieckaha rajsudu Miensku Kiryła Pałulecha. Sudździa pahadziŭsia sudzić aktyvista napaŭadzietaha — napiaredadni, paśla Čarnobylskaha šeścia, milicyjanty adabrali ŭ Rubcova majku z nadpisam «Łukašenka sychodź».
Padčas adbyćcia «chimii» ŭ speckamendatury Kuplin Pružanskaha rajonu Jury Rubcoŭ zrabiŭ sabie tatu na hrudziach z tym ža tekstam — «Łukašenka sychodź».
