«Robim usio mahčymaje i navat krychu bolš»: jak rychtujucca da prezidenckich vybaraŭ asnoŭnyja kandydaty
Pieradvybarčaja kampanija nabiraje abaroty. Da 17 lipienia patencyjnyja pretendenty na pasadu kiraŭnika dziaržavy pavinny pradastavić u CVK śpis svajoj inicyjatyŭnaj hrupy pa zbory podpisaŭ. «Naša Niva» spytała ŭ asnoŭnych kandydataŭ i pradstaŭnikoŭ ich štaboŭ, jak iduć spravy.
Andrej Dźmitryjeŭ, kiraŭnik pieradvybarčaha štaba Taćciany Karatkievič:
«Siońnia hałoŭnaja zadača – farmavańnie inicyjataŭnaj hrupy. Ludzi mohuć prychodzić da nas ŭ ofisy, plus my zrabili admysłovuju staronku ŭ internecie.
Druhaja važnaja zadača – heta pajezdki pa rehijonach i sustrečy ź ludźmi. U nas minimum čatyry pajezdki na tydzień».
Pa słovach Dźmitryjeva, na siońnia inicyjatyŭnaja hrupa naličvaje bolš za tysiaču čałaviek.
«U zbory podpisaŭ my budziem rabić uchił nie na pikiety, a na naviedvańnie ludziej. To bok pojdziem pa kvaterach ad dźviarej da dźviarej. Pa našym dośviedzie, heta značna bolš efiektyŭna», — skazaŭ jon.
Inšy kandydat, lidar partyi levych «Spraviadlivy śviet» Siarhiej Kalakin taksama zaniaty stvareńniem inicyjatyŭnaj hrupy.
«Usio idzie pa płanie. Na hetych vychodnych pryjeduć ludzi z rehijonaŭ i buduć padviedzieny vyniki farmiravańnia inicyjataŭnaj hrupy. Nie skažu, što ŭsie žychary Biełarusi kinulisia ŭ našu hrupu, bo jość peŭnyja składanaści, vyklikanyja palityčnaj sistemaj. Šmat chto baicca, my bačym, što vykarystoŭvajecca administracyjny cisk, kali na pracy, ci vučobie papiaredžvajuć, kab nie išli da apazicyjnych kandydataŭ, - kaža Kalakin. –
Ale my raźličvajem na 1,5 tysiačy čałaviek. My nie honimsia za kolkaściu, hałoŭnaje – nabrać ludziej, jaikija zmohuć pracavać».
Lidar Abjadnanaj hramadskaj partyi Anatol Labiedźka, zajaviŭ, što hetuju kampaniju było vyrašana pravodzić pa-novamu:
«My robim usio mahčymaje i, navat, krychu bolš. Našy štodniovyja zadačy: stvareńnie inicyjatyŭnaj hrupy i fandrajzinh (zbor resursaŭ - «NN»). My pravodzim kampaniju na vałanciorskich pačatkach, i heta naš pieršy taki dośvied. Ale navat kali jość vałanciory, vydatki ŭsio ž patrebny, - tłumačyć Labiedźka. –
U ideale dobra było b sabrać miljon dalaraŭ, ale dla našych umovaŭ, kali źbiarecca chacia b sto tysiač, možna budzie farmiravać biudžet i arhanizoŭvać infarmacyjnuju kampaniju. Heta jašče i tamu, što inicyjatyŭnaja hrupa budzie pracavać jak vałanciory, bo raniej mienavita heta było asnoŭnym punktam vydatkaŭ».
Pry hetym, adznačyŭ Labiedźka, aryjentacyja na vałancioraŭ daje jak plusy, tak i minusy.
«Šmat chto, čujučy, što nie budzie finansavańnia, hublaje cikavaść. Ja kažu navat pra struktury, i hramadskija, i palityčnyja. My — ideałahičnaja supołka, u nas jość aktyŭ, na jaki my možam abapiracca. A inšyja struktury, jakija pracujuć pa pryncypie francuzskaha lehijona, jakija pryvučyli svaich ludziej da hrošaj, – im pryjdziecca ciažej. Navat niekatoryja našy prychilniki sychodziać, kali daviedvajucca, što finansavańnia faktyčna nie budzie», — miarkuje Anatol.
Što tyčycca inicyjataŭnaj hrupy, to płany nastupnyja.
«My raźličvajem prykładna na tysiaču čałaviek, ź ich kala 500 budzie zajmacca zboram podpisaŭ. My viedajem, jak sabrać nieabchodnyja 100 000 podpisaŭ. U 2010 hodzie my sabrali 127 000 i spynili zbor», - śćviardžaje Labiedźka.
Taksama idzie praca pa vyłučeńni kandydatam u prezidenty palitviaźnia Mikałaja Statkieviča.
Štab ruchu salidarnaści «Razam» sabraŭ podpisy bolš za 200 čałaviek, jakija pahadzilisia stać siabrami inicyjatyŭnaj hrupy. Siarod ich Lavon Volski, Siarhiej Zakońnikaŭ, Alaksiej Maračkin, Jury Chaščavacki i inšyja.
Maryna Adamovič, žonka palitviaźnia i kaardynatar inicyjatyŭnaj hrupy ŭ padtrymku jaho jak kandydata ŭ prezidenty, raspaviała, što ŭžo padviedzieny papiarednija vyniki.
«Raźličvajem, što ŭ inicyjatyŭnuju hrupu ŭvojduć kala tysiačy čałaviek.
Taksama raspaŭsiudzili ŭ ŚMI zvarot z našymi kantaktnymi dadzienymi, tamu što šmat ludziej źviartajecca z pytańniem, jak nas znajści, navat praz fejsbuk, — paviedamiła Adamovič. — Naša asnoŭnaja meta — źviarnuć uvahu hramadstva, što ŭ našaj krainie nie mohuć adbyvacca sapraŭdnyja vybary biez vyzvaleńnia i reabilitacyi Mikałaja Statkieviča jak udzielnika minułaj kampanii i inšych palitviaźniaŭ. Tamu my budziem praciahvać źviartacca da biełaruskaj i mižnarodnaj supolnaści, nie tolki na praciahu rehistracyi inicyjatyŭnaj hrupy. My razumiejem, što naša ułada, napeŭna, nie daść zarehistravać Mikałaja ŭ jakaści kandydata. Ale ŭ zakanadaŭstvie jość taki momant, što inicyjatyŭnaja hrupa pavinna być zarehistravana, navat kali kandydatu ŭ rehistracyi admoviać».
Kamientary