Palitviazień Dziadok siadzić u kamiery, dzie na dvuch — piać kvadratnych mietraŭ

Paśla 42 dzion karceru palitviaźnia Mikałaja Dziadka na paŭhoda źmiaścili ŭ PKT — pamiaškańnie kamernaha typu. Pra heta baćka aktyvista Alaksandar Dziadok daviedaŭsia ź lista syna, jaki atrymaŭ dniami.

«Pryjšli ad jaho listy svajakam, u tym liku mnie. Znachodzicca jon ciapier u PKT. Nakiravali tudy na 6 miesiacaŭ z 30 červienia. Zaraz da jaho ŭ kameru źmiaścili jašče adnaho čałavieka. Kamera vielmi małaja — 5 kvadratnych metraŭ. Adčuvaje siabie nibyta narmalna, ale jak nasamreč… Na nastupnym tydni da jaho pajedzie advakat, tady daviedajemsia pra niejkija padrabiaznaści», — raspavioŭ Alaksandar Dziadok.

Niadaŭna da palitviaźnia Mikałaja Dziadka dvojčy nie dapuścili advakata. Pieršy raz, heta było 25 červienia, paśla 15 chvilin spynili razmovu i paabiacali praciahnuć paśla abiedu, ale abiacańnia nia vykanali. Na nastupnym tydni ŭvohule nie dazvolili sustreču z abaroncam — na toj padstavie, što nibyta Mikałaj Dziadok nie napisaŭ nieabchodnaj zajavy. Viadoma, što advakat abskardziŭ hetyja dziejańni supracoŭnikaŭ kalonii. Jak adreahavali na hetyja skarhi?

«Ničoha nie pryznali. Pa pieršym vypadku adkazali, što nie praciahnuli sustreču nibyta tamu, što jon užo skarystaŭsia mahčymaściu kantaktavać z advakatam, bo mieŭ razmovu ciaham hadziny. Ale nasamreč było tolki 15 chvilin. A što da druhoj admovy, nastojvajuć, što Mikałaj nibyta ŭvohule nie padavaŭ zajavy. Choć ciapier my dakładna viedajem, što heta chłuśnia, jon padaŭ zajavu jak maje być. To bok znoŭ padman dy niezakonny cisk. I, miarkuju, hety cisk budzie praciahvacca, ale i my budziem na heta reahavać. Budziem i dalej źviartacca, kudy tolki mahčyma, u vypadku, kali buduć parušać pravy Mikałaja», — skazaŭ baćka palitviaźnia.

U liście Mikałaj Dziadok padličyŭ, što za travień-červień prabyŭ u karcery ahułam 42 dni. Paśla vychadu z ŠYZA jamu pieradali adrazu 31 list, jakija nabralisia, pakul jon siadzieŭ u karcery. «Ciapier adkazvaje ŭsim, chto jamu napisaŭ», — paviedamiŭ pra syna Dziadok-starejšy.

Aktyvista anarchisckaha ruchu Mikałaja Dziadka ŭ lutym pakarali jašče adnym hodam źniavoleńnia nibyta za parušeńnie turemnaha režymu. Tady da vyzvaleńnia Dziadku zastavałasia ŭsiaho niekalki dzion. Raniej jaho asudzili na 4,5 hoda źniavoleńnia pavodle abvinavačańnia ŭ chulihanskich dziejańniach adnosna aficyjnych budynkaŭ. U sudzie svajoj viny Mikałaj Dziadok nie pryznaŭ, a ŭ kalonii admoviŭsia padpisvać prašeńnie ab pamiłavańni. Zakančeńnie terminu ŭ 4,5 hoda Mikałaj Dziadok adbyvaŭ u mahiloŭskaj krytaj turmie, ciapier palitviaźnia ŭtrymlivajuć u kalonii ŭ Horkach, jakaja pavodle ŭmovaŭ ličycca adnoj z samych žorstkich u Biełarusi.

• 0
• 0
• 0
• 0
• 0
• 0
• 0
• 0