Vasiamnaccać udzielnikaŭ mižnarodnaj kanfierencyi «Rasija i słavianskija narody ŭ vojnach i vajennych kanfliktach XIX—XX stahodździaŭ», jakaja prajšła 28 červienia ŭ Minsku, zapatrabavali viarnuć tekst vierša «Paklopnikam Rasii» na pastamient biusta paeta Alaksandra Puškina ŭ Mahilovie.
Nahadajem, 6 červienia, u dzień naradžeńnia vialikaha paeta, u Mahilovie kala vučebnaha korpusa biblijatečnaha kaledža, jaki nosić jaho imia, byŭ uračysta adkryty biust. Na jaho pastamiencie byŭ vybity ŭryvak z puškinskaha tvoru «Paklopnikam Rasii», jaki pačynajecca sa słoŭ «Il nam s Jevropoj sporiť novo, il russkij ot pobied otvyk?». Paśla chvali abureńniaŭ nieabyjakavych da historyi Biełarusi hramadzian, jakija ŭhledzieli ŭ hetych słovach ahresiŭnaje staŭleńnie Rasii da inšych narodaŭ i krain, mahiloŭskija ŭłady pryniali rašeńnie vydalić nadpis, što i było zroblena 12 červienia.
«Dziejańni pa «riedahavańni» tekstu na pomniku — nie što inšaje, jak sproba cenzury vialikaha paeta praz 178 hadoŭ paśla jaho śmierci», — havorycca ŭ zvarocie ŭdzielnikaŭ kanfierencyi ź Biełarusi i Rasii, nakiravanym ministru kultury Biełarusi Barysu Śviatłovu.
Padpisanty adznačajuć, što «biesprecedentny vypadak, jaki adbyŭsia ŭ Mahilovie, pobač ź jakim haśnie pavalnaje źniščeńnie pomnikaŭ savieckaj epochi va Ukrainie, užo nanios vielizarny maralny ŭron miljonam biełaruskich hramadzian». Taki ž uron, na ich dumku, budzie naniesieny i mižnarodnamu imidžu Biełarusi.
Aŭtary zvarotu prosiać ministra kultury asabista razabracca ŭ abstavinach zdareńnia.
«Spadziajemsia, što pomniku Alaksandru Siarhiejeviču Puškinu viarnuć jaho pieršapačatkovy vyhlad, i bolš na biełaruskaj ziamli nie paŭtorycca štości padobnaje», — havorycca ŭ dakumiencie, raźmieščanym na sajcie prarasijskaha prajekta «Zachodniaja Ruś».
