Pretendent u prezidenty, lidar Abjadnanaj hramadzianskaj partyi Anatol Labiedźka 22 lipienia prezientavaŭ svaju pieradvybarnuju prahramu «Miljon novych pracoŭnych miescaŭ» kala prachadnoj Minskaha traktarnaha zavoda. U hety čas rabočyja MTZ paśla zakančeńnia źmieny pakidali zavod.
«Ja šmat padarožničaŭ u apošnija dva miesiacy. Byŭ na prachadnych zavodaŭ, na rynkach u roznych haradach. I ŭ partyi, i ŭ bolšaści biełarusaŭ adna acenka situacyi ŭ krainie, — zajaviŭ lidar AHP. — Usie my vydzialajem adny i tyja ž prablemy: rost cen i finansavaja niestabilnaść; praca na skład i, adpaviedna, adsutnaść zarpłaty; rost biespracoŭja. Maja prahrama — heta adkaz na prablemy, jakija chvalujuć usiu Biełaruś».
Jak adznačyŭ Labiedźka, prahrama, anałahičnaja toj, jakuju jon pradstaŭlaje, na praktycy realizoŭvałasia ŭ inšych krainach, naprykład u Polščy i Estonii.
Pavodle jaho słoŭ, u Biełarusi možna nazvać tolki adzin prykład paśpiachovaha stvareńnia pradpryjemstva ź vialikaj kolkaściu novych pracoŭnych miescaŭ — heta zavod «Štadler». «Ale heta adziny prykład. Realizacyja našaj prahramy dazvolić stvarać pradpryjemstvy ź vialikaj kolkaściu pracoŭnych miescaŭ, pa 10—15 u kožnaj vobłaści», — skazaŭ pretendent u prezidenty.
U svaju čarhu, namieśnik staršyni AHP Leŭ Marholin źviarnuŭ uvahu, što partyja vystupała z prahramaj «Miljon novych pracoŭnych miescaŭ» na vybarach prezidenta jašče ŭ 2010 hodzie. «Kali b ułada ŭmieła słuchać svoj narod, to situacyja siońnia mahła b być zusim inšaj. Adnak u nas, naadvarot, za apošni hod situacyja stała pahražalnaj — ekanomika krainy straciła 75 tysiač pracoŭnych miescaŭ», — skazaŭ jon.
Marholin taksama zajaviŭ, što stvareńnie miljona novych pracoŭnych miescaŭ «realnaje», jano nie patrabuje vialikich hrošaj z boku dziaržavy, ale dla hetaha patrebna palityčnaja vola. «Ułada pavinna pamianiać pryjarytety, jana pavinna kłapacicca nie pra svajo daŭhalećcie, a pra dabrabyt biełaruskaha naroda», — adznačyŭ namieśnik kiraŭnika AHP.
Staršynia AHP i jaho namieśnik razdali rabočym MTZ infarmacyjnyja materyjały i paprasili ich pryjści ŭ čaćvier, 23 lipienia, na pracu z pašpartami, kab pastavić svaje podpisy ŭ padtrymku vyłučeńnia Labiedźki kandydatam u prezidenty. U toj ža čas sam Labiedźka źbirajecca ŭdzielničać u pikietavańni kala prachadnoj MTZ.
Čerhaŭ na miažy ciapier nie budzie? Čaho čakać ad adkryćcia «Bruzhoŭ» i «Bierastavicy»9
Kamientary