Novaja sproba damahčysia ad Rady Biaśpieki AAN adabreńnia na stvareńnie trybunała pa katastrofie «Boinha» MH17 va Ukrainie budzie pradpryniataja praz dva miesiacy, zajaviŭ ministr zamiežnych spraŭ Ukrainy Pavieł Klimkin u intervju ahienctvu Asašyejted pres.
Pavodle Klimkina, asnoŭnym arhumientam Rasii, jakaja nakłała vieta na rezalucyju RB AAN ab stvareńni trybunała, było toje, što hety krok źjaŭlajecca zaŭčasnym i niesvoječasovym. Maskva ŭkazvała na toje, što vyniki rasśledavańnia buduć hatovyja nie raniej za kastryčnik.
Praz dva miesiacy, kali budzie hatovaja spravazdača, piać krain — Małajzija, Aŭstralija, Niderłandy, Bielhija i Ukraina — majuć namier paŭtorna źviarnucca ŭ RB AAN z patrabavańniem stvareńnia trybunała.
''My nie źbirajemsia zdavacca. Praz dva miesiacy ŭ nas budzie kančatkovaja spravazdača [ab krušeńni «Boinha»]. I što ž Rasija skaža praz dva miesiacy? My, biezumoŭna, budziem sprabavać znoŭ, vykarystoŭvajučy ŭsie mahčymyja sposaby padtrymki mižnarodnaj supolnaści», — skazaŭ Pavieł Klimkin ahienctvu.
Jak skazaŭ Klimkin, Małajzija, Aŭstralija, Niderłandy, Bielhija i Ukraina ličać, što stvareńnie mižnarodnaha trybunała pa katastrofie «Boinha» było b najlepšym varyjantam z palityčnaha i zakanadaŭčaha punktaŭ hledžańnia.
U sieradu za pryniaćcie rezalucyi prahałasavali 11 z 15 krain-členaŭ Rady Biaśpieki. Anhoła, Kitaj i Vieniesueła ustrymalisia. Adnak Rasija zabłakavała pryniaćcie dakumienta, skarystaŭšysia svaim pravam vieta, jak pastajanny člen Rady Biaśpieki.
Kamientary