Nie tolki PUPy, ale TAA i TDA zmohuć składacca z adnaho ŭdzielnika — sa studzienia 2016 hoda
U Biełarusi tavarystva z abmiežavanaj adkaznaściu (TAA) i tavarystva z dadatkovaj adkaznaściu (TDA) zmoža funkcyjanavać, navat kali tam budzie tolki adzin udzielnik.
Pra heta zajaviŭ na bryfinhu ŭ Minsku namieśnik ministra ekanomiki Alaksandr Jarašenka, kamientujučy novaŭviadzieńni zakona «Ab uniasieńni źmianieńniaŭ i dapaŭnieńniaŭ u niekatoryja zakony Respubliki Biełaruś pa pytańniach haspadarčych tavarystvaŭ».
Dadzieny dakumient Alaksandr Łukašenka padpisaŭ 23 lipienia. Ale zakon ustupić u siłu 26 studzienia 2016 hoda.
Jak skazaŭ Jarašenka, značeńnie zakona dla biznes-asiarodździa «niemahčyma pieraacanić». Pry ažyćciaŭleńni svajoj dziejnaści jaho normami kirujecca bolš za 56 tysiač subjektaŭ haspadarańnia, a heta pałova ŭsich stvoranych u Biełarusi kamiercyjnych arhanizacyj. U pryvatnaści, pa stanie na 1 lipienia ŭ krainie dziejničaje 4.639 akcyjaniernych tavarystvaŭ, ź ich adkrytych — 2.347 i zakrytych — 2.292, kala 44 tysiač tavarystvaŭ z abmiežavanaj adkaznaściu i bolš za 7000 tavarystvaŭ z dadatkovaj adkaznaściu.
Z novaha hoda źjavicca mahčymaść dziejnaści haspadarčaha tavarystva, jakoje budzie składacca z adnaho ŭdzielnika.
«Raniej kali ŭ pracesie rearhanizacyi ŭ haspadarčych tavarystvaŭ zastavaŭsia adzin udzielnik, to tavarystva treba było albo pieraŭtvaryć va ŭnitarnaje pradpryjemstva, albo, u krajnim vypadku, likvidavać. Novy zakon dazvalaje isnavańnie haspadarčych tavarystvaŭ z adnym udzielnikam», — skazaŭ Jarašenka.
U Minekanomiki čakajuć usplosku cikavaści i pieraŭtvareńniaŭ PUPaŭ u haspadarčyja tavarystvy. Asabliva heta aktualna dla tych, «chto choča pryciahnuć u budučyni partnioraŭ i inviestaraŭ».
Razam z tym, isnavańnie haspadarčych tavarystvaŭ z adnym udzielnikam stvaraje peŭnyja ryzyki. U suviazi z hetym zakonam vyznačany i asobnyja abmiežavańni: naprykład, praduhledžvajecca zabarona na zasnavańnie takim tavarystvam inšaha tavarystva, adzinym udzielnikam jakoha jano budzie źjaŭlacca.
Jašče adnoj naviełaj zakona stanie ŭkaranieńnie instytuta «akcyjaniernaha pahadnieńnia» i «damovy ab ažyćciaŭleńni pravoŭ udzielnikaŭ tavarystva z abmiežavanaj adkaznaściu». Hetyja instytuty daŭno čakanyja zamiežnymi ŭdzielnikami biełaruskich haspadarčych tavarystvaŭ jak zvykły dla ich karparatyŭny miechanizm.
U Minekanomiki spadziajucca, što pryniaćcie nazvanych norm budzie sadziejničać pavyšeńniu rejtynhu Biełarusi ŭ spravazdačy Suśvietnaha banka «Viadzieńnie biznesu» pa pakazčyku «Abarona inviestaraŭ».
Haspadarčym tavarystvam zahadana pryvieści svaje statuty ŭ adpaviednaść z zakonam «pry pieršym paśla ŭstupleńnia ŭ siłu zakona płanavym uniasieńni ŭ ich źmianieńniaŭ».
Kamientary